ရွှေဖီမြေ၊ မတ်လ ၂၀ ရက်၊ မူဆယ်
ရှမ်းမြောက် မူဆယ်မြို့နယ် ၁၀၅ မိုင်မှာ ယာဉ်တိုက်မှု ဖြစ်ပွားခဲ့ပြီး အမျိုးသမီး ၂ ဦး ဒဏ်ရာ ရရှိခဲ့တယ်လို့ ဒေသခံ အမျိုးသားတစ်ဦးက ရွှေဖီမြေကို ပြောပါတယ်။
ဒီနေ့ မတ်လ ၂၀ ရက် မနက် ၁၀ နာရီခွဲဝန်းကျင်မှာ မိုင်းယု ၁၀၅ မိုင် နယ်မြေ(၁)က အောင်သိရီမင်္ဂလာသုခကျောင်း မုဒ်ဦးပေါက်အနီးမှာ ကုန်တင်ကား ၆ ဘီးနဲ့ အမျိုးသမီး ၂ ဦး စီးလာတဲ့ဆိုင်ကယ် မျက်နှာချင်းဆိုင် တိုက်မိခဲ့တာလို့ ဆိုပါတယ်။
“၂ ယောက် ဒဏ်ရာ ရတာ။ နောက်စေ့ကွဲတဲ့တစ်ယောက်ကတော့ စိုးရိမ်ရတယ်။ နောက်တစ်ယောက်ကတော့ ခြေထောက် ၂ ဖက် ပေါင်တွေ ပေါက်ပြဲပြီး မစိုးရိမ်ရဘူး။ ၂ ယောက်စလုံးက ၁၀၅ မိုင်ကပဲ။ ကားသမားတွေကို လောလောဆယ်တော့ ခေါ်မေးနေတာပေါ့”
ဒဏ်ရာရသူ ၂ ဦးဟာ အသက် ၆၀ နှစ်အရွယ် အမျိုးသမီးနဲ့ ၄၈ နှစ်အရွယ် အမျိုးသမီး ၁ ဦး ဖြစ်ပါတယ်။
ဒဏ်ရာ ရရှိခဲ့တဲ့ အမျိုးသမီး ၂ ဦးကိုတော့ ပါရမီ လူမှုကူညီရေးအသင်းက သွားရောက် သယ်ဆောင်ပေးပြီး မူဆယ်မြို့ ရွှေမူဆယ်ဆေးရုံသို့ ပို့ဆောင်ပေးခဲ့တယ်လို့ ဒေသခံတွေဆီက သိရပါတယ်။
အခုလို ယာဉ်တိုက်မှု မဖြစ်ပွားအောင် ကား၊ ဆိုင်ကယ် မောင်းသူတွေအနေနဲ့ ဂရုတစိုက် မောင်းပေးကြဖို့ကိုလည်း အထက်ပါ အမျိုးသားက ပြောပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
