ပျားကြီး၊ ဩဂုတ် ၂၆၊ မန္တလေး
လက်ရှိကျင်းပနေဆဲဖြစ်တဲ့ တောင်ပြုန်းနတ်ပွဲမှာ လက်နက်အပြည့်အစုံနဲ့လုံခြုံရေးရယူနေတဲ့ စစ်ကောင်စီလက်အောက်ခံပျူစောထီးတွေအထပ်ထပ်ရှိနေတဲ့ကြားက လုယက်ခံရမှုတွေဟာ နေ့စဥ်ရာနဲ့ချီပြီးရှိနေတယ်လို့ဒေသခံတွေကပြောပါတယ်။
မတ္တရာမြို့နယ်၊ တောင်ပြုန်းကျေးရွာမှာ ပြီးခဲ့တဲ့ ဩဂုတ်လ ၂၁ ရက်နေ့ကစပြီး နတ်ပွဲကိုကျင်းပပြုလုပ်ခဲ့တာဖြစ်ပြီး နေ့စဥ်အနယ်နယ်အရပ်ရပ်ကလူပေါင်းသောင်းနဲ့ချီလာရောက်ပူဇော်ပသမှုတွေပြုလုပ်ကြတာဖြစ်ပါတယ်။
“လုတဲ့သူက သူတို့(ပျူစောထီး)တွေရှေ့ကနေဖြတ်ပြေးသွားလို့ လုသွားတယ်၊ ဖမ်းပေးပါဆိုပြီးအကုန်ဝိုင်းအော်တာတောင်မသိသလိုလုပ်နေတာ။သွားတိုင်ရင်လည်း ဒီလောက်လူတွေအများကြီး ဘယ်လိုရှာပြီးဖမ်းရမှာလဲ။ အလုပ်ရှုပ်တယ်၊ လာမတိုင်ကြနဲ့၊ ကိုယ်ဖြစ်ရင်ကိုယ်ခံဆိုပြီးမောင်းထုတ်တာဆိုတော့ ဘယ်သူမှလည်းသွားမတိုင်ကြတော့ဘူး။အဲ့ဒါမျိုးက တစ်ရက်တစ်ရက်ကို ရာနဲ့ချီရှိတာ”လို့ မတ္တရာမြို့နယ်က ဈေးသည်တစ်ဦးကပြောပါတယ်။
လုယက်ခံရမှုတွေနဲ့ပတ်သက်ပြီးတိုင်ကြားမှုတွေအမြောက်အများရှိပေမဲ့ တစ်စုံတစ်ရာဖြေရှင်းအရေးယူတာတွေမရှိဘဲ လုယက်မှုကျူးလွန်သူတွေလည်းဖမ်းဆီးခံရတာမရှိဘူးလို့ လုယက်မှုကျူးလွန်ခံခဲ့ရတဲ့ အသက် ၅၀ အရွယ် မန္တလေးမြို့ခံအမျိုးသမီးတစ်ဦးကဆိုပါတယ်။
ပျူစောထီးတွေဟာ ပွဲတော်ကိုလာသမျှလူတွေဆီက ကားတစ်စီးကိုရွာဝင်ကြေးအဖြစ် ငွေကျပ် ၁၀၀၀၀ နှုန်း၊ ယာဥ်အပ်ခ ၅၀၀၀ နှုန်း၊ ဆိုင်ကယ်တစ်စီးကို ရွာဝင်ကြေး ၅၀၀၀ နဲ့အပ်နှံခ ၃၀၀၀ နှုန်းကိုနေ့စဥ်ကောက်ယူပြီးအဓမ္မစီးပွားရှာနေကြတယ်လို့ဒေသခံတွေကဆိုပါတယ်။
တောင်ပြုန်းနတ်ပွဲကို ဩဂုတ်လ ၂၈ ရက်(ဝါခေါင်လပြည့်နေ့)အထိပြုလုပ်မှာဖြစ်ပြီး နတ်ကိုးကွယ်မှုကိုယုံကြည်တဲ့ စစ်ကောင်စီအရာရှိပေါင်းများစွာဟာ ကန်တော့ပွဲတွေနဲ့ပူဇော်ပသမှုတွေပြုလုပ်လေ့ရှိနေတယ်လို့ တောင်ပြုန်းကျေးရွာကဒေသခံတစ်ဦးကဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
