လေကြောင်းတိုက်ခိုက်မှု

စစ်ကိုင်းတိုင်း မြောင်မြို့နယ် ဇရပ်ကုန်းကျေး‌ရွာကို စစ်ကောင်စီတပ်က လေကြောင်းကနေ ဗုံး ၂ ကြိမ် ကြဲချတိုက်ခိုက်ခဲ့လို့ အရပ်သား ၂ ဦး ထိမှန်ဒဏ်ရာရခဲ့တယ်လို့ မြောင်မြို့နယ် ပြည်သူ့ကာကွယ်ရေးတပ် TGR မှ တာဝန်ရှိသူတစ်ဦးက ရွှေဖီမြေကို ပြောပါတယ်။

ကရင်အမျိုးသားအစည်းအရုံး KNU ထိန်းချုပ်ဒေသ ပဲခူးတိုင်း မူးမြို့နယ်၊ ဆောထိ (ရွှေကျင်) မြို့နယ်နဲ့ ကျောက်ကြီး(လယ်ဒို) စတဲ့မြိုနယ်တွေမှာ ဖေဖော်ဝါရီ ၃ ရက် ကနေ ၈ ရက်အထိ စစ်ကောင်စီတပ်ရဲ့ လေကြောင်း၊ ဒရုန်းနဲ့ မြေမြှုပ်မိုင်းကြောင့် အရပ်သား ၂ ဦး သေဆုံးခဲ့ပြီး ၁ လသားကလေးအပါအဝင် ၇ ဦး ထိခိုက်ဒဏ်ရာရခဲ့ကြောင်း KNU ရဲ့ ထုတ်ပြန်ချက်အရ သိရပါတယ်။

မကွေးတိုင်း ပေါက်မြို့နယ်မှာ စစ်ကောင်စီတပ်က ဗုံးကြဲတိုက်ခိုက်လို့ ဒေသခံ ၁၀ ဦးထက်မနည်း သေဆုံးပြီး ဒဏ်ရာရရှိသူတွေလည်း ၈ ဦးအထိ ရှိခဲ့တယ်လို့ အညာမြေ အရပ်ဖက်လူမှုအဖွဲ့အစည်းမှ တာဝန်ရှိသူတစ်ဦးက ပြောပါတယ်။

ချင်းပြည်နယ်၊ ထန်တလန်မြို့နယ်ရှိ တလန်ခွါကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့ရာ ဒေသခံအမျိုးသား ၆ ဦး သေဆုံးပြီး အများအပြား ထိခိုက်ဒဏ်ရာရရှိခဲ့တယ်လို့ ဒေသခံတွေက ရွှေဖီမြေသို့ ပြောပါတယ်။

ပဲခူးတိုင်းဒေသကြီး နတ်တလင်းမြို့နယ်က တော်လှန်ရေးတပ်ဖွဲ့တွေရဲ့ ကာကင်းစခန်းတစ်ခုပေါ်မှာ ဒရုန်းနဲ့ ဗုံးသီးကြဲချတိုက်ခိုက်ခံရလို့ တော်လှန်ရေးရဲဘော် ၆ ဦး ကျဆုံးခဲ့တယ်လို့ Bamar Revolution Army – B.R.A က ထုတ်ပြန်လာပါတယ်။

ကရင်အမျိုးသားအစည်းအရုံး (KNU) ထိန်းချုပ်နယ်မြေဖြစ်တဲ့ ဒေါ်ဖခို(သံတောင်)မြို့နယ်နဲ့ ကစယ်ဒိုမြို့နယ်မှာ စစ်ကောင်စီတပ်ရဲ့ လေကြောင်းတိုက်ခိုက်မှုနဲ့ လက်နက်ကြီး ပစ်ခတ်မှုကြောင့် အမျိုးသမီးတစ်ဦး သေဆုံးပြီး ဦးဇင်းတစ်ပါး ဒဏ်ရာရခဲ့တယ်လို့ KNU က မနေ့ ဖေဖော်ဝါရီ ၈ ရက်မှာ ထုတ်ပြန်ထားပါတယ်။

ချင်းပြည်နယ်တောင်ပိုင်း၊ မတူပီ၊ မင်းတပ်နဲ့ ကန်ပက်လက်မြို့နယ်တို့ကို စစ်ကောင်စီက တစ်ရက်တည်း ဗုံးကြဲတိုက်ခိုက်ခဲ့ရာ ကလေး ၁ ဦး သေဆုံးပြီး ၁၀ ဦးကျော် ထိခိုက်ဒဏ်ရာရရှိခဲ့တယ်လို့ ဒေသခံတွေက ရွှေဖီမြေသို့ ပြောပါတယ်။

ကရင်အမျိုးသားအစည်းအရုံး (KNU) ထိန်းချုပ်ဒေသဖြစ်တဲ့ ခလယ်လွီထူခရိုင်၊ မုန်း (မူး) မြို့နယ်မှာ စစ်ကောင်စီတပ်ရဲ့ ဒရုန်းနဲ့ ဗုံးကြဲတာ၊ လေယာဥ်နဲ့ ဗုံးကြဲတာနဲ့ လက်နက်ကြီး ပစ်ခတ်မှုတွေကြောင့် အရပ်သား ၃ ဦး သေဆုံးပြီး ၁ ဦး ဒဏ်ရာရခဲ့တယ်လို့ KNU က မနေ့ ဖေဖော်ဝါရီ ၆ ရက်မှာ ထုတ်ပြန်ထားပါတယ်။