တိုက်ပွဲသတင်း

စစ်ကိုင်းတိုင်း မင်းကင်းမြို့မှာ အမျိုးသားညီညွတ်ရေးအစိုးရ- NUG ရဲ့ လက်အောက်ခံ မင်းကင်းပြည်သူ့ကာကွယ်ရေးအဖွဲ့၊ ပြည်သူ့အုပ်ချုပ်ရေးအဖွဲ့နဲ့ ဒေသကာကွယ်ရေးတပ်ဖြစ်တဲ့ ကျောင်းသားတော်လှန်ရေးတပ်တော်- SRF အကြား စစ်ရေး တင်းမာမှု ဆက်လက် ဖြစ်ပွားနေတယ်လို့ SRF ရဲ့ ပြောရေးဆိုခွင့်ရှိသူက ရွှေဖီမြေကို ပြောပါတယ်။

ချင်းပြည်နယ်တောင်ပိုင်း ကန်ပက်လက်မြို့နယ်ဘက် စစ်ကြောင်း ထိုးလာတဲ့ စစ်ကောင်စီတပ်ဟာ လက်ရှိမှာ မြို့အဝင်ထိ ရောက်ရှိလာပြီး တိုက်ပွဲ ပြင်းထန်နေတယ်လို့ ရှေ့တန်း စစ်ရေးသတင်းရင်းမြစ်က ရွှေဖီမြေသို့ ပြောပါတယ်။

ချင်းကာကွယ်ရေးတပ် (တွန်းဇံ) ၂ နှစ်လောက်ကြာ ထိန်းချုပ်ထားတဲ့ တွန်းဇံမြို့ကို စစ်ကောင်စီနဲ့ ဇိုမီးတော်လှန်ရေး (ZRA) ပူးပေါင်းအဖွဲ့တို့က ပြန်လည်သိမ်းပိုက်နိုင်ရေး စစ်ကြောင်းတွေ ထိုးနေတယ်လို့ ဒေသခံတွေဆီက သိရပါတယ်။

တနင်္သာရီတိုင်း ဘုတ်ပြင်းမြို့နဲ့ ပြည်ကြီးမဏ္ဍိုင်မြို့ကြား ပြည်ထောင်စုလမ်းမပေါ်မှာရှိတဲ့ ဘိုဒါးကျေးရွာစခန်းကို ကရင်အမျိုးသားလွတ်မြောက်ရေးတပ်မတော် – KNLA နဲ့ တော်လှန်ရေး ပူးပေါင်းတပ်တွေက တိုက်ခိုက်သိမ်းပိုက်နိုင်ခဲ့တယ်လို့ KNU က ထုတ်ပြန်ထားပါတယ်။

ကရင်အမျိုးသားအစည်းအရုံး- KNU/KNLA ရဲ့ တပ်မဟာ (၇)နယ်မြေ ဘားအံခရိုင် မဲသဝေါဒေသရှိ စစ်တပ်ရဲ့ ကြယ်ပြောင်ကုန်းစခန်းကို KNLA နဲ့ ပူးပေါင်းတပ်ဖွဲ့ တိုက်ခိုက်သိမ်းပိုက်ခဲ့ပါတယ်။