ရွှေဖီမြေ၊ ဇူလိုင် ၆ ရက်၊ ပေါက်
မကွေးတိုင်း ပေါက်မြို့နယ် ကုက္ကိုစုကျေးရွာမှာ PDF တပ်ဖွဲ့ဝင်တွေအပါအဝင် အရပ်သား ၁၁ ဦးကို စစ်ကောင်စီတပ်က သတ်ဖြတ်ခဲ့တယ်လို့ မကွေးတိုင်း ပကဖက မနေ့ ဇူလိုင် ၅ ရက်မှာ သတင်းထုတ်ပြန်ပါတယ်။
ကုက္ကိုစုကျေးရွာကို တော်လှန်ရေးတပ်တွေ တိုက်ခိုက်သိမ်းပိုက်ပြီးနောက် စစ်ကောင်စီတပ်ရဲ့ PDF နဲ့ အရပ်သားတွေကို သတ်ဖြတ်ခဲ့တဲ့ အထောက်အထားတွေကို ဖမ်းဆီးရမိတဲ့ စစ်သုံ့ပန်းတွေထံက တွေ့ရှိခဲ့တာဖြစ်တယ်လို့ ဆိုပါတယ်။
မကွေးတိုင်း ပကဖရဲ့ ထုတ်ပြန်ချက်မှာ စစ်ကောင်စီတပ်က ကုက္ကိုစုကျေးရွာအနီးရှိ လူထု ၁၃ ဦးအပါအဝင် PDF ရဲဘော် ၂ ဦးနဲ့ အတည်မပြုနိုင်သေးသူ ၂ ဦးကို ဖမ်းဆီးခဲ့ရာ ၉ ဦးကို သတ်ဖြတ်ခဲ့တယ်လို့ ဖော်ပြထားပါတယ်။
သတ်ဖြတ်ခံရတဲ့သူတွေထဲက ၂ ဦးကို စစ်ကောင်စီတပ်ဘက်က အရှင်လတ်လတ် မီးရှို့ခဲ့တဲ့ အထောက်အထားတွေ တွေ့ရှိခဲ့ပြီး ကျန် ၆ ဦးကိုတော့ စစ်ကောင်စီလက်အောက်ခံ ပြည်သူ့စစ်အတွင်း အာမခံပေးတဲ့သူရှိလို့ ရိုက်နှက်ပြီး ပြန်လွှတ်ပေးခဲ့တယ်လို့ ဆိုပါတယ်။
ဒါ့အပြင် ပေါက်ပကဖ တပ်ဖွဲ့ဝင် ၂ ဦးကိုလည်း စစ်ကောင်စီလက်အောက်ခံ ပျူစောထီးတွေက ဖမ်းဆီးခဲ့ပြီး သတ်ဖြတ်ခဲ့တယ်လို့ ဖော်ပြထားပါတယ်။
ရေပြာရဲစခန်းနဲ့ ပျူစောထီးကျေးရွာဖြစ်တဲ့ ကုက္ကိုစုကျေးရွာကို ပြီးခဲ့တဲ့ ဇွန်လ ၄ ရက်မှာ တော်လှန်ရေးတပ်တွေဘက်က တိုက်ခိုက်သိမ်းပိုက်နိုင်ခဲ့တာ ဖြစ်ပါတယ်။
တိုက်ပွဲအတွင်း အလင်းဝင်လာတဲ့ စစ်ကောင်စီလက်အောက်ခံ ရဲတပ်ဖွဲ့ဝင် ၆ ဦးအပါအဝင် ဖမ်းဆီးရမိတဲ့ စစ်သုံ့ပန်းတွေကို ကောင်းမွန်စွာ ထိန်းသိမ်းထားတယ်လို့ မကွေးတိုင်း PDF က ဆိုထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
