ယာရူစိင်၊ ကျံရ်ဇူန်လည် ဆငည်း 6၊ ဆဘော
ကောန်အီမာည်း ကဝ်အီဂေါည်ခေဲင်အရာပ်ဒီန်အူအီး က္လာင်းတဆျှိုည်ဖီမျေဒါႈ တာဘြောင်ဇံင် ကီုင်းဆဘော ကပီုန်ဆျှံမ်ကဒါႇပိူည် အ်ုန်အီမိုႈဒီပ်ုန်ထိင်ခြဲအူန်း တံပ်ကညာအာဏာဆီုက်ဇေဝ်ကဲနီန် နှဲဖါ်ႈလာ်ဒါလံပ်ကတ်ုမ် က္လာင်းကနာည်နှာင်းတိုအီးခေဲင်အရာပ်ကဲ အာဝ်တောပ်ဒေတိုည်း တိုအီးဘြားကဲကာည်း တိုအီးစိုန်ကဲနီန်အောႏ။
ဂေါႇမိုႈအ်ုန်နောႈမှည် ကဆီုဝ်လံပ်ကတ်ုမ်တိုအီးခေဲင်အရာပ်ကဲ စီပဲန်အ်ုန်က္လာင်း ကနာည်နှာင်းကဲအာဝ်တောပ်ဒေတိုည်း ကဲအီႎိူဝ်ႈဂါင်အီး၊ ကဲအီနှဲလာ်ဒါဆနာတ်စိုန်ကာည်း ကဲအီဘြားဟာဝ်း ခေဲင်ကီုင်းဆဘောနီန်အောႏ။
“ဘိူည်ပဲန်ဟာဝ်းအမှုမာ် မိုႈပွံတ်တိုတာဘြောင်ဇံင်က္လာင်းဒါႈ ကနာည်နှာင်းကဲ အာဝ်တောပ်အမှုဒီန်။ တောန်အ်ုန်ပဲန်ဟာဝ်းမာ် နှေရ်ပွံတ်အာဝ်မိူဝ်ႈ ဇီုင်းကပ္လိူင်တအဆေ”
တအမှုကောန်အီမာည်း 2အီး ဂါရ်အီနှဲဖါ်ႈလာ်ဒါဆနာတ် စိုန်ဟာဝ်းခေဲင်ဂါင် အ်ုန်အီမိုႈလိူည်ကောန်ကညောမ်ကဲနီန်ဂေါည် ခေဲင်ရဝ်ညောင်ကိုးပင် ကီုင်းဆဘော ပ်ုန်ပဲန်ဟာဝ်း ခည်ကျံရ်ဇူန် ခိင်ညှာ ဆငည်း 24ဒိူန်မာ် ကဲဒါႈဖါ်ႈမိုႈ ကနာည်လံပ်ကတ်ုမ်ကောန်ကညောမ်ကဲဒီန် စီဇံင်းႎီုန်လာ်ဒါႇအမှုဒီန်အောႏ။
မိူဝ်ႈဘိုးတိုအီးခေဲင်ကီုင်းအူအီး က္လာင်းဒါႈ “အ်ုန်ဒါႈႎါည်းနီန်မာ် နံင်ကီုတ်လိူည်ကောန်ကညောမ်ကဲဒီန် အာဝ်တိုည်းယာ့် တိုအီးစိုန် 2အီးဂါရ်ဒီန်။ အခည်းအ်ုန် တိုအီးဘြား၊ တိုအီးစိုန်ဒါႈအီး ဂေါႇမိုႈအယ်အာဝ်တောပ်လာ်တိုည်း စီပဲန်အ်ုန်ဇေဝ်ဒေဲႈ ဘာည်းကဇေန်နီးနီန်။ ဘိူည်ဂေါည်ဂေါည်ပဲန်ဒေဲႈအမှုဘြားမာ် ဘ်ုပ်ဒါႈလိူည်မိုႈကာမ်”
ကဲဒါႈ ကဒါႇလူမ်ပလိက်မာ် ဂီုည်တံမ်းအူန်းလိူည်ဒါႈ ကဆီုဝ်ကူန်ရဝ်မာဂါင်ကဲ လိုခြဲတ်ဖါ်ႈ ကနာည်လံပ်ကတ်ုမ်ကာည်း ကနာည်နံင်လိုဂေါည် ဆဒိဆဒိအောႏ။
ကဇေန်နီး ဂေါႇမိုႈဘည်ဘ်ုပ်ကတူႈအီးႎိူဝ်ႈဂါင်၊ ဘည်ဘ်ုပ်ကတူႈအီးဘြားဆဲင်ကယ်ကာည်း ဘည်ဘ်ုပ်ကတူႈစိုန် ပဆဘောမာ် ဂေါႇမိုႈတိုအီးခေဲင်အရာပ်ကဲ နောႈမှည်ကနာည်လံပ်ကတ်ုမ်ကဲ စီပဲန်ကဲဂီုည်းမှာန်းအူန်း ကဆီုဝ်ကဲအီကဆီုဝ်ကဆဲင်ကဲနီန် တိုည်းစေတ် ကဲအီလူည်ႇအမှုကဲဒီန်အောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
