ရွှေဖီမြေ၊ ဖေဖော်ဝါရီ ၁ ရက်၊ နမ္မတူ
နမ္မတူ-မန်တုံ ပြည်ထောင်စုလမ်းမပေါ်မှာ ယာဉ်တိုက်မှာဖြစ်လို့ အသက် ၁၆ နှစ်အရွယ် ကလေးတစ်ဦး သေဆုံးသွားခဲ့ကြောင်း သိရှိရပါတယ်။
ဇန်နဝါရီ ၃၀ ရက် မနက် ၉ နာရီ ဝန်းကျင်မှာ မန်တုံကနေလာတဲ့ ကုန်တင်ယာဉ်တစ်စီးနဲ့ နမ္မတူမှလာတဲ့ ဆိုင်ကယ်နဲ့ အမျိုးသားက မျက်နှာချင်းဆိုင်တိုက်ပြီး ဦးခေါင်းက ဒဏ်ရာကြောင့် နမ္မတူ ဆေးရုံသို့ ပို့ဆောင်ပေးပြီး ဇန်နဝါရီ ၃၁ ရက်မှာ သေဆုံးသွားခဲ့တာ ဖြစ်ပါတယ်။
သေဆုံးသူဟာ မန်တုံမြို့နယ် မော်လုံးကျေးရွာက အသက် ၁၆ နှစ်အရွယ် မောင်ကျော်အောင်ဖြစ်တယ်လို့ ဆိုပါတယ်။
ယာဉ်တိုက်မှု မကြာခဏဖြစ်ပွားတာဟာ ဆိုင်ကယ်နဲ့ ကား မောင်းသူတွေက အရှိန်တင်မောင်းတာကြောင့်နဲ့ လမ်းကျဉ်းတာကြောင့် ဖြစ်တယ်လို့ နမ္မတူမြို့နေ အမျိုးသမီးက ဆိုပါတယ်။
”ဒီတလော ကားကြီးတွေလည်း ဖြစ်သလိုမောင်းကြတယ်။ ဆိုင်ကယ်သမားတွေလည်း လမ်းကျော်မောင်းကြတယ်။ အကုန်လုံးက စည်းကမ်းရှိဖို့ လိုတယ်” လို့ ပြောပါတယ်။
ယာဉ်တိုက်မှုတွေ လျော့ကျဖို့ အသက်မပြည့်တဲ့ ကလေးတွေကို ယာဉ်တွေ ပေးမမောင်းသင့်တဲ့အပြင် ယာဉ်စည်းကမ်း လမ်းစည်းကမ်းကိုလည်း ပိုတင်းကြပ်ဖို့ သက်ဆိုင်ရာတွေကို တိုက်တွန်းလိုကြောင်း အထက်ပါ အမျိုးသမီးက ဆိုပါတယ်။
အလားတူ ပြီးခဲ့တဲ့ ၂၀၂၅ ခုနှစ် ဇွန်လကလည်း နမ္မတူ-မန်တုံ လမ်းပေါ်မှာ ကားတစ်စီး ချောက်ထဲကျလို့ အမျိုးသားတစ်ဦး သေဆုံးခဲ့ရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
