ရွှေဖီမြေ၊ ဇူလိုင် ၇ ရက်၊ နမ့်ခမ်း
ယမ်းပေါက်ကွဲမှုကြောင့် ထိခိုက်မှုများခဲ့တဲ့ တအာင်းတပ်-PSLF/TNLA ထိန်းချုပ်ထားတဲ့ နမ့်ခမ်းမြို့နယ် ကောင်းတပ်ရွာ ပြန်လည်ထူထောင်ရေးကို ကူညီပေးမှု ပြီးစီးပြီဖြစ်ကြောင်း TNLA က ထုတ်ပြန်ထားပါတယ်။
ကူညီထောက်ပံ့ရေးလုပ်ငန်းတွေကို နောက်ဆုံးအဆင့်အဖြစ် ပြီးခဲ့တဲ့ ဇူလိုင် ၄ ရက်မှာ ကောင်းတပ်ကျေးရွာရှိ နေအိမ်စုစုပေါင်း ၈၉ အိမ်(အဝါရောင်ဇုန်) ကို ပျက်စီးဆုံးရှုံးသွားတဲ့ အခြေအနေပေါ်မူတည်ပြီး ထောက်ပံ့ငွေ ကျပ်သိန်း ၇,၁၄၅ ကို ကူညီထောက်ပံ့ပေးနိုင်ခဲ့တာလို့ ဆိုပါတယ်။
ကျန်ရှိနေသေးတဲ့ အများပိုင်အဆောက်အဦးဖြစ်တဲ့ စာသင်ကျောင်းအဆောက်အဦးနဲ့ ဘုန်းကြီးကျောင်းအဆောက်အဦးတွေကို အမြန်ဆုံး ပြန်လည်ထောက်ပံ့ကူညီနိုင်ဖို့ လိုအပ်တဲ့ အစီအစဉ်တွေကို ဆက်လက်ဆောင်ရွက်နေသေးတယ်လို့ ဖော်ပြထားပါတယ်။
ပေါက်ကွဲမှုကြောင့် ပျက်စီးသွားတဲ့ နေအိမ်တွေကို ထောက်ပံ့ကူညီငွေ စုစုပေါင်း ကျပ်သိန်း (၅,၃၉၄၁) ကူညီပေးခဲ့ပြီး သေဆုံးသူနဲ့ ဒဏ်ရာရရှိသူတွေကို ကျပ်သိန်း (၆၂၉၀) ထောက်ပံ့ကူညီပေးခဲ့ပါတယ်။
ကောင်းတပ်ရွာ ပေါက်ကွဲမှုအတွင်း ကူညီပေးခဲ့ကြတဲ့ ပရဟိတအသင်းအဖွဲ့တွေအပါအဝင် ပြည်တွင်းပြည်ပရှိ အလှူရှင်တွေကို ကျေးဇူးတင်ရှိကြောင်း တအာင်းတပ်က ထုတ်ပြန်ထားဖူးပါတယ်။
ပြီးခဲ့တဲ့ မေလ ၃၁ ရက်မှာ TNLA ရဲ့ စီးပွားရေးဌာနက ယမ်းသိုလှောင်ရုံ ပေါက်ကွဲမှုကြောင့် ကောင်းတပ်ရွာမှာ လူပေါင်း ၄၃ ဦး သေဆုံးပြီး ဒဏ်ရာရသူ ၁၅၄ ဦး ရှိခဲ့ကာ နေအိမ်ပေါင်း ၆၈၀ လုံး ပျက်စီးခဲ့တာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
