သုတ၊ မေလ ၁၉ ရက်
တအာင်းလူမျိုးတွေရဲ့ ရင်ထဲ စွဲမြဲနေတဲ့ “ဆငည်းဟိုက်ဇိုက်ဇာရ်”သီချင်းကို ရေးသားခဲ့သူ တားမြတ်ထွန်း ကွယ်လွန်သွားပြီလို့ မိသားစုနဲ့ နီးစပ်သူတွေဆီက သိရပါတယ်။
တားမြတ်ထွန်းဟာ ၎င်းနေထိုင်တဲ့ ရှမ်းမြောက် လားရှိုးမြို့နယ် ခေးနင်းကျေးရွာမှာ ရောဂါနဲ့ မနေ့ မေလ ၁၈ ရက် ည ၉ နာရီ ၅၀ မိနစ်က ကွယ်လွန်သွားတယ်လို့ ဆိုပါတယ်။
“လူကြီးရောဂါနဲ့ ကွယ်လွန်သွားတာပါ။ သဂြိုလ်တာက ၂၂ ရက်နေ့မှ သဂြိုလ်မှာ။ သူ့သားသမီးတွေက အဝေးမှာ ရောက်နေလို့ ပြန်လာအောင် စောင့်ရအုံးမယ်” လို့ မိသားစုဝင်နဲ့ နီးစပ်သူတစ်ဦးက ရွှေဖီမြေကို ပြောပါတယ်။
တားမြတ်ထွန်း ကွယ်လွန်ချိန်မှာ အသက် ၇၇ နှစ်ရှိပြီဖြစ်ပြီး မကွယ်လွန်ခင်အထိ လားရှိုးမြို့နယ် တအာင်းစာပေနဲ့ယဉ်ကျေးမှု နာယကအဖြစ် တာဝန်ယူခဲ့တယ်လို့ သိရပါတယ်။
တားမြတ်ထွန်းရဲ့ဇာတိဟာ နမ့်ခမ်းမြို့နယ် အွယ်လောအုပ်စု မန်စက်ရွာကဖြစ်ပြီး ၁၉၉၆ ခုနှစ်ဝန်းကျင်က လားရှိုးမြို့နယ် ခေးနင်းရွာဘက် ပြောင်းရွှေ့နေထိုင်ခဲ့တာပဲ ဖြစ်ပါတယ်။
တားမြတ်ထွန်း ရေးသားခဲ့တဲ့ “ဆငည်းဟိုက်ဇိုက်ဇာရ်”သီချင်းဟာ တအာင်းလူမျိုးတွေကို စည်းလုံးညီညွတ်မှုရှိဖို့ နိုးကြွစေတဲ့ သီချင်းဖြစ်ပြီး တအာင်းနဲ့ပတ်သက်တဲ့ ပွဲတော်အများစုရဲ့ ဖွင့်ပွဲတိုင်းမှာ အဲဒီသီချင်းကို အမြဲသီဆိုလေ့ ရှိကြပါတယ်။
တားမြတ်ထွန်း ကွယ်လွန်သွားပြီ ဖြစ်ပေမဲ့ ၎င်းရေးသားခဲ့တဲ့ “ဆငည်းဟိုက်ဇိုက်ဇာရ်” သီချင်းကတော့ တအာင်းလူမျိုးတွေရဲ့ရင်ထဲ စွဲမြဲနေဆဲ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
