ရွှေဖီမြေ၊ ဩဂုတ် ၁၁ ရက်၊ လယ်ဒို
ကရင်ပြည်နယ် ခလယ်လွီထူခရိုင် လယ်ဒိုမြို့နယ်မှာ စစ်ကောင်စီတပ်သား ၄ ဦး ကရင်တပ်မတော်- KNLA တပ်ရင်း(၉)ထံ လက်နက်ချ အလင်းဝင်လာတယ်လို့ KNU က မနေ့ ဩဂုတ် ၁၀ ရက်မှာ သတင်းထုတ်ပြန်ထားပါတယ်။
ပြီးခဲ့တဲ့ ဩဂုတ် ၆ ရက်မှာ စစ်ကောင်စီရဲ့ ခြေလျင်တပ်ရင်း (ခလရ ၆၀)က တပ်သား မျိုးမင်းဦး၊ ဩဂုတ် ၉ ရက်မှာ ခြေမြန်တပ်ရင်း (ခမရ ၅၉၆)က တပ်သား မိုးအေး၊ တပ်သား မမင်းခန့်နဲ့ တပ်သား ရဲမင်းအောင်တို့ အလင်းဝင်လာတာပါ။
တပ်သား မျိုးမင်းဦးဟာ သူနဲ့အတူ ပါလာတဲ့ MA-4 ၁ လက်၊ ၄၀ မမ ကျည် ၁၁ လုံး၊ ကျည်ဘောက် ၃ ခုနဲ့ ၅.၅၆ ကျည် ၃၀၃ တောင့် ယူဆောင်လာခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
၎င်းတို့ ၄ ဦးစလုံးဟာ စစ်တပ်ရဲ့ အုပ်ချုပ်မှုစနစ်အောက်မှာ ဆက်လက်နေထိုင်လိုခြင်း မရှိတော့တာကြောင့် အလင်းဝင်ခဲ့ခြင်းဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။
ဒါကြောင့် မိမိဆန္ဒမပါဘဲ အတင်းအဓမ္မ စစ်မှုထမ်းခံနေရတဲ့ တပ်သား၊ တပ်ဖွဲ့ဝင်တွေအနေနဲ့ မိမိတို့ရဲ့ အသက်အန္တရာယ်နဲ့အနာဂတ်ကို ကာကွယ်နိုင်ဖို့အတွက် နီးစပ်ရာ တော်လှန်ရေးတပ်ဖွဲ့တွေထံ အလင်းဝင်ကြဖို့ ကရင်အမျိုးသားအစည်းအရုံးက ထပ်မံ တိုက်တွန်းထားပါတယ်။
ပြီးခဲ့တဲ့ ဩဂုတ် ၃ ရက်မှာ တပ်မ(၂၂) လက်အောက်ခံ ခြေမြန်တပ်ရင်း ခမရ ၂၀၃ နဲ့ ခမရ ၂၁၀ တို့က ဒေါနအရှေ့ခြမ်းကို စစ်ကြောင်းထိုး ဝင်ရောက်လာချိန် KNLA နဲ့ပူးပေါင်းတပ်ဖွဲ့ရဲ့ ကြားဖြတ်တိုက်ခိုက်မှုကြောင့် ခမရ ၂၀၃ မှ ဗိုလ်မှူးအဆင့်ရှိ စစ်ကြောင်းမှူးအပါအဝင် စစ်ကြောင်းတစ်ခုလုံးနီးပါး သေဆုံးခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
