ပိုႈလဘား၊ ကျံရ်အောဂ်ုတ် ဆငည်း 12၊ နံမ့်ဖကာ
ဘိူန်းအယ်နံပ်တောပ်ပ်ုန်က္လာင်း ကောန်အီမာည်း ကဝ်အီနံပ်ဘည်မိုႈဘည်ဘာည်းနီန်အူအီး က္လာင်းဒါႈ တာဘြောင်ရဝ်နံမ့်ဖကာ လှံင်အေဲမ်ကိုက် ကပီုန်ဆျှံမ်ကဒါႇပိူည်နီန်အူအီး ကတူႈအီးဒါဘိုတ်က္လဟာဝ်းအ်ုန်အောႏ။
ကောန်အီမာည်းဒီန် က္လာင်းဒါႈ ကဝ်အီကတူႈက္လဒါဘိုတ်ဒီန်မိုႈ တာယည်လာ ဘိူန်းအဆာက် 56ဆန်ုမ် အ်ုန်အီမိုႈတာဘြောင်ရဝ် ရဝ်ပါင်စရောပ် ခမိုရဝ်နံမ့်ဖကာ က်ုန်မိုႈတိုပိုင်းခန္ဓာယံမ်းအ်ုန်ဒီန် ကဲယိူဝ်းဒေဲႈ ခိင်ညှာကျံရ်အောဂ်ုတ် ဆငည်း 11ဒိူန် ခေဲင်လိုင်းငါမ်းမာည်းအ်ုန်အောႏ။
“အ်ုန်ဟာဝ်းအီတ်ပလိုင်းငါမ်းမာည်းအ်ုန်ဒီန် ဟည်မိုႈ 3ဆငည်း 4ဆငည်းယာ့်။ လိုင်းငါမ်းမာည်းအ်ုန်မိုႈ ကဒါႇဒေင်ဟာဝ်းမူစယ်။ ဆငည်းမှောအ်ုန်ကတူႈပျံမ်းမာ် အာဝ်နံပ်။ က်ုန်အယ်တိူရ်ႈပုင်ရံင်အ်ုန် နှေရ်မိုႈဟည်ဘိူန်း ကပံတ် 3ဆငည်းယာ့်။ မိုႈလိူည်ဆငည်း 11ဒိူန် ကဲစီယိူဝ်းလာ် တိုပိုင်းခန္ဓာယံမ်း ပ်ုန်ကတူႈတပျံမ်းဒီန်။ အ်ုန်ရေဲန်ဒေဲႈ တာဘြောင်ရဝ် ဟည်ဘိူန်း 3ဆန်ုမ်ယာ့်”
က်ုန်မိုႈဂေါႇဆေအ်ုန်ကတူႈပျံမ်းဒီန်ကာည်း အဆေမိုႈအီပျံမ်းဟာဝ်းအ်ုန် ညှံမ်နံပ်စိ က်ုန်မိုႈတိုပိုင်းခန္ဓာယံမ်းအ်ုန် ဖုင်လံပ်ငိူပ်မေန်း အီဂေါည်ပနံမ့်ဖကာကဲ ဟည်ဟာဝ်းတိူဝ်ႈဟောည်ႇယာ့်အောႏ။
ဒီကတူႈတာယည်လာ အ်ုန်အီမိုႈတာဘြောင်ရဝ်နီန်တပျံမ်း အ်ုန်မိုႈဒီဟာဝ်းႎီရ် ဆဲႈဒါႇတံပ်ကိုးကာင်း – MNDAA ကဲ ဒီဟာဝ်းႎီရ် တံပ်ဆီုက်ခါင် – KIA ကဲမာ် မိုႈအေ့အောႏ။
ခည်ဆန်ုမ် 2025 ကျံရ်ဒီဆဲမ်ဘာ ဆငည်း 2ဒိူန်မာ် တိူမ်ပဲန်ဒေဲႈအေ့ ဘည်ကတူႈဂါရ်အူပီးအူမေဲန် အီဂေါည်ပရဝ်နံမ့်ဖကာ ဂါရ်အီယိူဝ်ႇပဂီုင်နီန်ႎီရ်ဒေဲႈ ကတူႈအီးက္လဟာဝ်းဂါရ် တောပ်ဒေင်ဒီန်အောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
