မြတ်နိုး၊ ဩဂုတ် ၁၂ ရက်၊ ဖားကန့်
ကချင်ပြည်နယ် ဖားကန့်မြို့နယ် ဖားပြင် စက်လှေဂိတ်မှာ မနေ့ ဩဂုတ် ၁၁ ရက် နေ့လယ်ပိုင်းက ကားတစ်စီးနဲ့အတူ လူလည်း ဥရုချောင်းထဲ ကျသွားခဲ့ပြီးနောက် အချိန်မှီ ကယ်ဆယ်နိုင်ခဲ့ကြောင်း ဒေသခံတွေဆီက သိရပါတယ်။
“ဥရုချောင်းမှာ ကားရော လူရော ကျသွားတာ ဟုတ်တယ်။ ဖားကန့်-ဆိပ်မူသွားလမ်း ဖားပြင် စက်လှေဂိတ်မှာ ဖြစ်တာ” လို့ ဒေသခံ အမျိုးသားတစ်ဦးက ပြောပါတယ်။
အဓိက ဖားကန့်-ယူမာ-ဆိပ်မူဘက်သွားတဲ့ အဓိကလမ်းပိုင်းက စစ်ရေးကြောင့် ပိတ်ထားတာဖြစ်ပြီး နှစ်ဖက်တပ်ဖွဲ့ရဲ့ ထောင်မိုင်း ရှိတယ်လို့ သူက ပြောပါတယ်။
အဓိက လမ်းပိုင်းကနေ သွားလာလို့ မရတာကြောင့် ဒေသခံတွေက ဖားကန့်ကနေ ဆိပ်မူသွားတာဖြစ်ဖြစ်၊ ဆိပ်မူကနေ ဖားကန့်ကို သွားတာဖြစ်ဖြစ်၊ ဖားကန့်-ဆန်းကြွယ်-ဖားပြင်-ဘဇံချောင်း-ဆိပ်မူဘက်ကို စက်လှေနဲ့ သွားရတာဖြစ်ပြီး လက်ရှိ ကားကျသွားတဲ့ စက်လှေဂိတ်က ဖားပြင်-ဘဇံချောင်း ကူးတဲ့နေရာလို့ သူက ရှင်းပြပါတယ်။
“ဖားပြင် စက်လှေဂိတ်မှာ ကားရော လူရော ဥရုချောင်းထဲ ကျသွားတာ ဟုတ်တယ်။ လူရော ကားရော ဆွဲတင်နိုင်ခဲ့တယ်။ ဘာမှဖြစ်မသွားဘူး” လို့ နောက်ထပ်ဒေသခံတစ်ဦးက ပြောပါတယ်။
ဖားကန့်ကနေ ဆိုင်းတောင်၊ ဖားပြင်၊ ဘဇံချောင်းဖြတ်ပြီး ဆိပ်မူဘက် သွားလာတဲ့ လမ်းကြောင်းမှာ ဖြစ်ပွားခဲ့တာဖြစ်ပြီး စက်လှေဂိတ်မှာ ကားနဲ့လူ ဥရုချောင်းထဲ ကျသွားတာလို့ ဒေသခံတချို့က ဆိုပါတယ်။
စက်လှေဂိတ်ကိုဖြတ်ပြီး သွားလာရတာကြောင့် ခရီးသွားတွေအတွက် သွားလာရေး ပိုမိုခက်ခဲနေလို့ ဒေသခံတချို့ကတော့ အဓိကလမ်းကို ဖွင့်ပေးဖို့ အခက်အခဲ ရှိရင်တောင် လူထုတွေရဲ့ ကျန်းမာရေးနဲ့ သွားလာရေးအတွက် အချိန်ပိုင်းအနေနဲ့ ဖွင့်ပေးစေချင်တယ်လို့ တောင်းဆိုနေကြပါတယ်။
လမ်းပိတ်ထားတာကြောင့် အရေးပေါ်ကျန်းမာရေးကိစ္စနဲ့ သွားလာရသူ၊ ခရီးသည်တင်ကားအနေနဲ့ လမ်းလွှဲပြီး အချိန်ပိုပေးကာ သွားလာနေရတယ်လို့ ဒေသခံတွေက ပြောပါတယ်။
ဖားကန့်မြို့နယ်အတွင်း ယာဉ်သွားလာရေး အခက်အခဲဟာ အခုဖြစ်စဉ်မတိုင်ခင်ကတည်းက ရှိနေခဲ့တာဖြစ်ပြီး ပြီးခဲ့တဲ့ ဇွန်လကလည်း ဖားကန့်-ယူမာကူးတို့ဆိပ်မှာ ယာဉ်ကြီးယာဉ်ငယ် ပိတ်ဆို့ကြန့်ကြာတာတွေလည်း ဖြစ်ပွားခဲ့ပါတယ်။
ဖားကန့်ဒေသမှာ စစ်တပ်နဲ့ တော်လှန်ရေး ပူးပေါင်းတပ်တို့အကြားက စစ်ရေးအခြေအနေကြောင့် လမ်းပိုင်းတချို့ ပိတ်ထားလေ့ ရှိပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
