ဝတ်ရည်၊ မေလ ၂၈ ရက်၊ လားရှိုး
ရှမ်းမြောက် လားရှိုးမြို့နယ် လွယ်လမ့်ကျေးရွာက သစ်သီးပွဲရုံဂိုဒေါင်တစ်ခု မီးလောင်မှု ဖြစ်ပွားခဲ့တယ်လို့ လွယ်လွမ့်ဒေသခံတစ်ဦးက ရွှေဖီမြေကို ပြောပါတယ်။
မနေ့ မေလ ၂၇ ရက် နေ့လယ် ၁၂ နာရီခွဲဝန်းကျင်မှာ မီးလောင်ခဲ့တာဖြစ်ပြီး ညနေ ၄ နာရီမှာ အနီးနားရှိ ဒေသခံတွေ ဝိုင်းဝန်းမီးငြိမ်းသတ်ခဲ့တာပဲ ဖြစ်ပါတယ်။
လွယ်လွမ့်ဒေသခံတစ်ဦးက “နေ့လယ်တုန်းက မီး စလောင်တာ။ မီးသတ်ကားတွေလည်း လာတယ်။ သူတို့ မီးအား မနိုင်တော့လို့ ပြန်လှည့်ကြတာ။ အထိအခိုက်တော့ မရှိဘူးလို့ ကြားတာပဲ။ အဲဂိုဒေါင်က အကြီးကြီးပဲလေ။ သစ်သီးပွဲရုံလို့လည်း ခေါ်ကြတယ်” လို့ ပြောပါတယ်။
အဲဒီဂိုဒေါင်မှာ သစ်သီးအပြင် ဆိုင်ကယ် သိုလှောင်ထားတဲ့ ဂိုဒေါင်တစ်ခုလည်းဖြစ်ပြီး ပစ္စည်းအများစု မီးလောင်ဆုံးရှုံးသွားကာ ဆုံးရှုံးသွားတဲ့ ပစ္စည်းတန်ဖိုးကိုတော့ မသိရသေးပါဘူး။
ပြီးခဲ့တဲ့ မေလ ၁၆ ရက် ည ၁၂ နာရီကျော်မှာလည်း လားရှိုးမြို့ ရပ်ကွက် ၂ ရှိ ဆွယ်တော်ဖြူ ကုန်စုံဆိုင်မှာ ဝါယာကြိုး ရှော့ပ်ဖြစ်ရာကနေ မီးလောင်မှု ဖြစ်ပွားခဲ့ပါတယ်။
နွေရာသီမှာ အပူချိန်မြင့်ပြီး အလွယ်တကူ မီးလောင်မှု ဖြစ်ပွားနိုင်တာကြောင့် မီးလောင်မှု ထပ်မဖြစ်ပွားအောင် မီးဘေးအန္တရာယ်ကို အထူးဂရုစိုက် ကာကွယ်ဖို့ လိုအပ်ကြောင်း ဒေသခံတွေက ပြောပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
