ဝတ်မှုံ၊ မေလ ၂၇ ရက်၊ လားရှိုး
စစ်ကောင်စီ ထိန်းချုပ်ထားတဲ့ ရှမ်းမြောက် လားရှိုးမြို့နယ်မှာ စစ်တပ်ပိုင်မြေကို ကျူးကျော်နေထိုင်တယ်ဆိုပြီး ဒေသခံတွေရဲ့ နေအိမ် ၉ လုံးကို စစ်တပ်က ဘက်ဖိုးတွေနဲ့ လာရောက်ဖျက်ဆီးသွားတယ်လို့ ဒေသခံတွေက ပြောပါတယ်။
မနေ့ မေလ ၂၆ ရက်မှာ ရပ်ကွက်(၉)၊ နယ်မြေ (၁)၊ ခေးနင်းလမ်းသွယ်(၈)၊ ဆင်တောင် ဘောဓိနှစ်ထောင်အနီးက နေအိမ် ၉ အိမ်ကို စစ်တပ်က ဘိုဒိုဇာတွေနဲ့ လာရောက်ဖျက်ဆီးသွားတာလို့ ဖြစ်စဉ်သိရှိသူ ဒေသခံတစ်ဦးက ပြောပါတယ်။
“သူတို့(ဒေသခံတွေ) နေလာတာ ၁၅ နှစ်ရှိပြီ။ မီတာတွေလည်း ရ အိမ်အမှတ်တွေလည်း ကျပြီးသား။ အခု တပ်မြေ မလွတ်ဘူးဆိုပြီး အကုန်ကုတ်ပစ်လိုက်တာပဲ။ ပြောတုန်းကကျတော့ အနောက်နည်းနည်းပဲလို့ ပြောတာ။ တပ်၊ စည်ပင်၊ ရဲ၊ မီးသတ်၊ မော်တော်ပီကယ်(ယာဉ်ထိန်းရဲ) အကုန်လာတာပဲ”
အဆိုပါ မြေနေရာပေါ် ဒေသခံတွေ နေထိုင်လာတာ ၁၅ နှစ်ဝန်းကျင် ရှိနေပြီး ဦးသိန်းစိန် အစိုးရလက်ထက်ကတည်းက ရေဘေးဒုက္ခသည်တွေအတွက် ချပေးခဲ့တဲ့နေရာ ဖြစ်တယ်လို့ ဆိုပါတယ်။
နောက်ထပ် ဒေသခံအမျိုးသားတစ်ဦးက “အရင်တုန်းကတော့ သူတို့ ပေးနေထားတာ။ ပေးနေပြီးမှ နှစ်ပေါင်းများစွာ ကြာလာတော့ တိုက်အိမ်တွေတောင်ပါတယ်။ အကုန်ဖျက်သွားတာ သူတို့။ သူတို့အကုန်းလုံး ဘက်ဖိုးတွေနဲ့ ဘိုဒိုဇာတွေနဲ့ လာထိုးသွားပြီ။ သူတို့ အကုန်သိမ်းမှာ။ ၄၁ နားက ဆိုင်ခန်းတွေလည်း အကုန်သိမ်းထားပြီ။ အဲဒါ(ဆိုင်ခန်း)တွေ အရင်ကတည်းက အကုန်သိမ်းထားတာ” လို့ ပြောပါတယ်။
လက်ရှိမှာတော့ နေအိမ် ဖျက်ဆီးခံရတဲ့ ဒေသခံတချို့က အိမ်ခန်း ငှားနေရပြီး အိမ်ခန်း မငှားနိုင်တဲ့ မိသားစုတွေက လမ်းဘေးမှာ ယာယီတဲ ထိုးပြီး နေထိုင်နေကြရတယ်လို့ ဆိုပါတယ်။
အလားတူ ဖေဖော်ဝါရီလကလည်း စစ်တပ်၊ ရဲနဲ့ ဌာနဆိုင်ရာတွေက ကျောက်မဲမြို့ ငြိမ်းချမ်းရေးကုန်းက နေအိမ် ၃ အိမ်နဲ့ ရဲစခန်းကပ်ရပ်က နေအိမ် ၂ အိမ်ကို ဖယ်ရှားခိုင်းတာတွေ ရှိခဲ့ဖူးပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
