ရွှေဖီမြေ၊ ဧပြီ ၂၄ ရက်၊ လားရှိုး
လားရှိုးမြို့နယ် အီနိုင်းရွာအနီးက ဒေသခံတွေနဲ့လမ်းသွားတဲ့ ခရီးသည်အမျိုးသားနဲ့အမျိုးသမီးတွေအပါအဝင် လူငယ် ၇၀ ဦး ဝန်းကျင်ကို ကိုးကန့်တပ် MNDAA မူးယစ်ဆေးဝါး စစ်ဆေးတယ်ဆိုတဲ့ အကြောင်းပြချက်နဲ့ ဖမ်းဆီးခေါ်ဆောင်သွားခဲ့ကြောင်း ဒေသခံအမျိုးသမီးရဲ့ ပြောပြချက်အရ သ်ိရပါတယ်။
ပြီးခဲ့တဲ့ ဧပြီ ၂၁ ရက် မနက် ၉ နာရီကနေ နေ့လယ် ၁ နာရီအထိ လားရှိုး-နမ္မတူကြားရှိ ၁၀ မိုင်ကုန်းက ဒေသခံအပါအဝင် အီနိုင်းဒေသခံနဲ့ တောင့်တလောင်လမ်းခွဲမှာလည်း ခရီးသွားဒေသခံတွေကို ရှောင်တခင် စစ်ဆေးပြီး ဖမ်းဆီးခဲ့တာ ဖြစ်ပါတယ်။
ကိုယ်တိုင်မြင်ခဲ့ရသူ အီနိုင်းဒေသခံ အမျိုးသမီးက “သူတို့က ဒေသခံရော လမ်းသွားသူရောအကုန်ဖမ်းတာပါ။ ပြောတာကတော့ ဆေးသုံးတာကို စစ်တာတဲ့။ အသက်ကြီးတဲ့လူကို ပြန်လွတ်တယ်။ အသက်အရွယ်ကောင်းတွေဆို အကုန်ခေါ်သွားတာ” လို့ ပြောပါတယ်။
၎င်းဖမ်းဆီးထားတဲ့သူတွေကို နေ့တွင်းချင်းမှာဘဲ သိန္နီမြို့သို့ ခေါ်ဆောင်သွားခဲ့ပြီး မိသားစုတွေလည်း တွေ့ဆုံခွင့်မပြုကြောင်း ဖမ်းဆီးခံခဲ့ရတဲ့ မိခင်ဖြစ်သူက ဆိုပါတယ်။
အီနိုင်းအပါအဝင် လားရှိုးမြို့ပြင်ရှိ ကျေးရွာအများအပြားမှာ ကိုးကန့်တပ်က လူငယ်တွေကို ပစ်မှတ်ထားပြီး မူးယစ်ဆေးဝါး သုံးမသုံးကို စစ်ဆေးပြီး သုံးစွဲပါက စစ်မူထမ်းခိုင်းတာတွေလည်း ရှိနေတယ်လို့ ဒေသခံတွေက ပြောပါတယ်။
လက်ရှိ ဖမ်းဆီးခေါ်ဆောင်သွားခြင်းခံရတဲ့ လူငယ် ၇၀ကျော်ဟာလည်း စစ်မူထမ်းဖို့ ခေါ်ဆောင်သွားတာ ဖြစ်နိုင်တာကြောင့် လူငယ်တွေ သွားလာရေးသတိထားကြဖို့ ရွာခံတွေက ဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
