ဆျှိုည်ဖီမျေ၊ ကျံရ်အေပ်ြုရ် ဆငည်း 5၊ နော်င်ခေဝ်
ဘိူန်းအယ်နံပ် တောပ်ပ်ုန်က္လာင်းကောန်အီပ်ုန် ကဝ်အီဂေါည်ခေဲင်အရာပ်ဒီန်အူအီးဒါႈ ဂေါႇမိုႈမဴင်တီႇခေဲင်ကတာည်းကဲနီန် ဆီုင်ဂီုည်မိူဝ်ႈအူန်း ခေဲင်လိုင်းငါမ်းမာည်း ပလှံင်နော်င်ခေဝ်ကဲနီန် စီပဲန်ကညာလိုင်းကဲကဒါႇဂီုန်း ဘ်ုပ်ႎီုန်ဟာဝ်းဒိုႇ လိုင်းငါမ်းမာည်းကဲဒီန်အောႏ။
ဆဲႈဒါႇခမိုရဝ်တောင်ရှည် လှံင်နော်င်ခေဝ် ရဝ်နောင်တောကာည်း တောင်ခမ်းကဲနီန်မာ် ဂေါႇပ္လေါည်ကတီုက်ကပဴင် ဘည်ဂေါည်ဂေါည်ငျား တိုအီးခေဲင်အရာပ်ကဲတ ညဲ့မဴင်တီႇခေဲင်ကတာည်းကာည်း လာက်နာက်ဒါင်း အီမိုႈဂြိုခြီုင်လာက်နာက်ဆီုက်အီကီုတ်ကဲနီန် ဘိူည်ယိူဝ်းအူန်း လာက်နာက်ဒါင်း အီညှံမ်ပဒူႈကဲဒိူန် ရီမ်းပြောလိုင်းငါမ်းမာည်းမာ် အာဝ်မိူဝ်ႈစိ ဘည်ဒေဲႈပႎဲႈဒဲႈ အီကဆီုဝ်ကဆဲင်ကဲအောႏ။
ကောန်အီပ်ုန် ကဝ်အီမိုႈကညာလိုင်းနီန်အူအီး က္လာင်းဒါႈ “လိုင်းကပံတ် 100နီန် ကပံတ် 80 အီအာဝ်ကိုႈယာ့်။ ဆာ်မိုႈကညာလိုင်းကဲမံင်ခ္လဒိူန် ကဲတိုက်ဖါ်ႈဒါရအာည်ႇ စီကိုႈ။ ယဲႎီုန်အူန်းလိူည်။ တိုအီးကဒါႇဂီုန်း ရာမ်ချှူမ်ဒိုႇယာ့်”
အ်ုန်ဒါႈ ဆီုင်ခည်ကျံရ်ေႎှဲပ်ဘျူရီဒိူန် တိုအီးခေဲင်အရာပ်ကဲ ဘိူည်မှာန်းအီကဆီုဝ်ကဆဲင်ကဲ ဆာင်လာင်ဒဲႈမဴင်ကဲဒီန်မာ် ကဲဆာင်လာင်ဒဲႈလိူည် ဒီစရီတ်အောႏ။
မိူဝ်ႈဘိုးကောန်အီမာည်းအူအီး က္လာင်းဒါႈ ဆဲႈဒါႇဒီန် ဂေါႇမိုႈတိုအီးခေဲင်အရာပ်နော်င်ခေဝ်ကဲနီန် ဂေါည်ဂေါည်ငျားဒေညဲ့ မဴင်တီႇခေဲင်ကတာည်း ကဲဘိူည်ဆီုပ်မှာန်းဘိုး တီုင်ဌာနအီကဆီုဝ်ကဆဲင်ကဲ ဆာင်လာင်ဒဲႈမာ် ညှံမ်မိူဝ်ႈစိ ဘည်ဒေဲႈဆာင်လာင်ဒဲႈကဲအောႏ။
အ်ုန်ဒါႈ “မဴင်၊ ပ္လေဘောမ်ကာည်း လာက်နာက်ဒါင်းကဲနီန် လဲ့ပွံတ်ဘည်တီရ်ႈ။ ဒီမှောမာ် အာဝ်ယပ္လေဇိူင်။ ဘည်မှောနံင်ဘာည်း ရေဲန်ဟောမ်ဇီုင်း”
ဂေါႇဘည်ဒီန် စီပဲန်ကောန်အီမာည်း ရကႎိုည်နီန် က္လာင်းဒါႈ ဆိင်ဒဲႈဖါ်ႈ အီမိူဝ်ႈဇီုင်းကပ္လိူင်ကဲ ဒေဲႈဆာင်လာင်ဖါ်ႈ နှာင်းဘိူန်းကိုႈဟာဝ်းငါမ်းမာည်းနီန် ချာ်န်းချာ်န်းအောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
