ရွှေဖီမြေ၊ ဧပြီ ၆ ရက်
ရှမ်းမြောက် ကျေးသီးမြို့နယ် ဝမ်ဟိုင်းဒေသကနေ အာရက္ခတပ်တော် – AA ထံ ပို့ဆောင်မယ့် ၁၁.၇ ဘီလီယံတန်ဖိုးရှိတဲ့ မူးယစ်ဆေးဝါးတွေကို ဖမ်းဆီးရမိခဲ့တယ်လို့ စစ်ကောင်စီက မနေ့ ဧပြီ ၅ ရက်မှာ ထုတ်ပြန်ပါတယ်။
ပြီးခဲ့တဲ့ ဧပြီ ၄ ရက်မှာ မကွေးတိုင်း နတ်မောက်မြို့နယ် ရွာတော် စီစစ်ရေးဂိတ်နဲ့ စိုင်းကောင်းကျေးရွာအနီးမှာ ကား ၂ စီးနဲ့ တင်ဆောင်လာတဲ့ မူးယစ်ဆေးဝါးအိတ် ၃၉ အိတ်ထဲမှာ စိတ်ကြွဆေးပြား ၇၈ သိန်း သိမ်းဆည်းရမိခဲ့တာဖြစ်တယ်လို့ ဆိုပါတယ်။
ဖမ်းဆီးတရားခံ ၃ ဦးရဲ့ ထွက်ဆိုချက်အရ အဲဒီ မူးယစ်ဆေးဝါးတွေကို ဝမ်ဟိုင်းဒေသကနေ ရမည်းသင်း – ပျော်ဘွယ် – နတ်မောက် – မကွေး လမ်းကြောင်းကနေတစ်ဆင့် ပဒန်းမြို့နယ်ကို ပို့ဆောင်မှာဖြစ်တယ်လို့ ထုတ်ပြန်ချက်ထဲ ဖော်ပြထားပါတယ်။
ဒါ့အပြင် ပဒန်းမြို့နယ်ကနေတစ်ဆင့် ရခိုင်ပြည်နယ် အမ်းမြို့နယ်ရှိ မြို့နယ်မှူးအဆင့်ရှိ AA ရဲ့ ခေါင်းဆောင်ဆီကို ပို့ဆောင်မှာဖြစ်တယ်လို့ စစ်ကောင်စီက စွပ်စွဲထားပါတယ်။
စစ်ကောင်စီတပ်ဘက်က AA ရဲ့ မူးယစ်ဆေးဝါးတွေကို မကြာခဏ ဖမ်းဆီးရမိကြောင်း ထုတ်ပြန်နေပြီး AA ရဲ့ ပြောရေးဆိုခွင့်ရှိသူ ဦးခိုင်သုကတော့ စစ်ကောင်စီတပ်ဟာ နိုင်ငံရေးဂုဏ်သိက္ခာကျအောင် လုပ်ဆောင်နေတာဖြစ်တယ်လို့ မီဒီယာတွေမှာ ပြောဆိုထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
