ရွှေဖီမြေ၊ ဩဂုတ် ၄ ရက်၊ သံတွဲ
အာရက္ခတပ်တော်- AA ထိန်းချုပ်ထားတဲ့ သံတွဲမြို့နယ် ငပလီမြို့ ဂျီတ္တော ၉ ရပ်ကွက်ထဲ မနေ့ ဩဂုတ် ၃ ရက် မနက် ၁၀ နာရီခွဲကစပြီး စစ်ကောင်စီတပ်က ဂျက်ဖိုက်တာ ၃ စီးနဲ့ Y-12 ၁ စီး အသုံးပြုပြီး ဗုံးအလုံးရေ ၆၀ နီးပါး ဆက်တိုက် ကြဲချတိုက်ခိုက်သွားခဲ့တယ်လို့ AA က သတင်းထုတ်ပြန်ထားပါတယ်။
လေကြောင်းနဲ့ တိုက်ခိုက်ခဲ့တဲ့နေရာတွေဟာ အပြစ်မဲ့အရပ်သား နေထိုင်တဲ့နေရာဖြစ်ပြီး ဗုံးကြဲတိုက်ခိုက်မှုကြောင့် အသက် ၄၁ နှစ်အရွယ် ဦးကျော်သူနိုင်နဲ့ ၆၀ အရွယ် ဒေါ်မစန်းမြင့်တို့နှစ်ဦး ထိမှန်ဒဏ်ရာ ရရှိခဲ့ကြတယ်လို့ ဆိုပါတယ်။
ဒေသခံတွေ ကြိုတင်တိမ်းရှောင်ကြတာကြောင့် သေဆုံးမှု ထိခိုက်မှု နည်းပါးပေမဲ့ နေအိမ်၊ အဆောက်အဦး၊ ဘန်ဂလို ၂၀ ဝန်းကျင်နဲ့ လူအသုံးဆောင်ပစ္စည်း ပျက်စီးခဲ့ပြီး ကာလတန်ဖိုးငွေ ကျပ်သိန်း ၃ ထောင်ဝန်းကျင် ဆုံးရှုံးမှုရှိခဲ့တယ်လို့ ဖော်ပြထားပါတယ်။
AA ဟာ ရခိုင်ပြည်နယ်ထဲက မြို့အားလုံးကို ထိန်းချုပ်နိုင်ဖို့ စစ်တပ်ကို ထိုးစစ်ဆင်နေသလို စစ်ကောင်စီတပ်ဘက်ကလည်း AA ထိန်းချုပ်ထားတဲ့ နယ်မြေတွေကို ပြန်လည်ရရှိဖို့ တန်ပြန်ထိုးစစ်ဆင်နေပြီး အရပ်သားအပါ် လေကြောင်း တိုက်ခိုက်မှု ခပ်စိပ်စိပ် ပြုလုပ်လာနေပါတယ်။
AA က လက်ရှိအချိန်ထိ ရခိုင်ပြည်နယ်ထဲက မြို့ ၁၄ မြို့နဲ့ ချင်းပြည်ထဲက ပလက်ဝမြို့တို့ကို ဆက်လက်ထိန်းချုပ်ထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
