ရွှေဖီမြေ၊ ဧပြီ ၂၆ ရက်၊ မူဆယ်
စစ်ကောင်စီတပ် ထိန်းချုပ်ထားတဲ့ မူဆယ်မြို့မှာ အမျိုးသားတစ်ဦး KTVမှာ အသုံးများတဲ့ မူးယစ်ဆေးဝါးတစ်မျိုးဖြစ်တဲ့ (K) ရှူလွန်ပြီး သေဆုံးသွားခဲ့ကြောင်း ၎င်းနဲ့ နီးစပ်သူ ဖြစ်စဉ်ကိုသိရသူ အမျိုးသားတစ်ဦးရဲ့ ပြောပြချက်အရ သိရပါတယ်။
မနေ့ ဧပြီ ၂၅ ရက် မနက် ၆ နာရီ ဝန်းကျင်မှာ မူဆယ်မြို့နယ် နမ့်အွမ်ကျေးရွာနေ အသက် ၃၀ ဝန်းကျင် အရွယ် အဲလူငယ်ဟာ မူဆယ်မြို့ရှိ KTV တစ်ခုမှာ တစ်ညလုံး မူးယစ်ဆေးဝါး (K) ရှူပြီး မနက်မှာ သေဆုံးသွားခဲ့တာ ဖြစ်ပါတယ်။
ဖြစ်စဉ်ကိုသိရသူ အမျိုးသားက “နေ့ခင်းက သူတို့ သူငယ်ချင်းအဖွဲ့လိုက် ချောင်းငါးဖမ်းသွားကြသေးတယ်။ ညရောက်မှ မူဆယ်တက်ကြတာ။ တစ်ညလုံး KTV ထဲ သောက်စားကြတာ။ မနက်ရောက်မှ သေတာ” လို့ ပြောပါတယ်။
၎င်းအမျိုးသားဟာ ဓားပြတိုက်ခံရကြောင်း ဆိုကြပေမဲ့ သူနဲ့ နီးစပ်သူတွေက မူးယစ်ဆေးဝါးအသုံးလွန်ပြီး သေဆုံးတာဖြစ်ကြောင်း ဆိုကြပြီး ဖြစ်စဉ်အသေးစိတ်ကို ထပ်သိနိုင်ဖို့ ရွှေဖီမြေက ဆက်လက်စုံစမ်းနေဆဲ ဖြစ်ပါတယ်။
မူဆယ်မြို့မှာ အမျိုးသားအပြင် အမျိုးသမီးတွေလည်း စိတ်ကို ပြောင်းလဲစေတဲ့ Happy water, K, WY နဲ့ ရွှေစတဲ့ မူးယစ်ဆေးဝါးတွေကို သုံးစွဲကြတာကြောင့် မကြာခဏ သေဆုံးတာတွေ ရှိကြောင်း ဒေသခံတွေက ဆိုပါတယ်။
စစ်ကောင်စီတပ်အပြင် လက်အောက်ခံ ပြည်သူ့စစ်နဲ့ လက်နက်ကိုင်ပေါင်းစုံရှိတဲ့ တရုတ်-မြန်မာနယ်စပ်မြို့ဖြစ်တဲ့ မူဆယ်မြို့မှာ မူးယစ်ဆေးဝါးနဲ့ လောင်းကစားတွေကြောင့် အလားတူ ဖြစ်စဉ်မျိုး မကြာခဏ ဖြစ်ပွားသလို ခိုးမှု၊ လုယက်မှုနဲ့ ပြန်ပေးဆွဲမှုတွေလည်း မကြာခန ဖြစ်ပွားနေပေမဲ့ သက်ဆိုင်ရာက တာဝန်ယူဖြေရှင်းပေးတာမရှိခဲ့ကြောင်း ဒေသခံတွေက ရွှေဖီမြေကို ပြောပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
