ပပ၊ မေလ ၁၉ ရက်၊ နောင်ချို
ရှမ်းမြောက် နောင်ချိုမြို့နယ် အုမ္မသီးရွာက အမျိုးသားတစ်ဦးဟာ မြေမြှုပ်မိုင်းတစ်လုံး ခုတ်မိရာ ပေါက်ကွဲပြီး ခြေထောက်တစ်ဖက် ပြတ်သွားကြောင်း ဖြစ်စဉ်သိရှိတဲ့ အမျိုးသားတစ်ဦးရဲ့ ပြောပြချက်အရ သိရပါတယ်။
ပြီးခဲ့တဲ့ မေလ ၁၁ ရက် နေ့လယ် ၁ နာရီဝန်းကျင်မှာ အုမ္မသီးရွာမှာ နေထိုင်တဲ့ အသက် ၃၄ နှစ်အရွယ် စိုင်းလောင်လျန်းဟာ ခြံရှင်းရင်း မိုင်းခုတ်မိခဲ့တာပဲ ဖြစ်ပါတယ်။
ဖြစ်စဉ်ကိုသိရှိသူ အမျိုးသားက “သူက ခြံရှင်းရင်း ဓားကောက်နဲ့ အဲမိုင်းကို ခုတ်မိလို့ ပေါက်သွားတာ။ မျက်နှာမှာရော ဒဏ်ရာ ရတယ်။ ခြေထောက်က ပိုပြင်းတာပေါ့” လို့ ပြောပါတယ်။
လက်ရှိမှာတော့ ၎င်းအမျိုးသားဟာ ပြင်ဦးလွင် ပြည်သူ့ဆေးရုံမှာ ကုသမှု ခံယူနေပြီး ဆေးကုသဖို့ အကူအညီ လိုအပ်ကြောင်းလည်း သူက ဆက်ပြောပါတယ်။
ပြီးခဲ့တဲ့ မေလ ၁၂ ရက်ကလည်း နောင်ချိုမြို့ ပါဟတ်ရပ်ကွက်မှာ နေထိုင်တဲ့ အသက် ၁၉ နှစ်အရွယ် ထက်ကိုအောင်ဆိုသူဟာ နေအိမ်မှာ ထင်းခွဲရင်း မိုင်း ထိမိပြီး ပေါက်ကွဲခဲ့ရာ လက်တစ်ဖက် ဖြတ်လိုက်ရတယ်လို့ သိရပါတယ်။
အလားတူ မတ်လ ၂၉ ရက်ကလည်း နောင်ချိုမြို့နယ် ညောင်တောကျေးရွာအုပ်စု ယာပြင်ရွာခံ ၂ ဦး ခြံအတွင်း သန့်ရှင်းရေးလုပ်ရင်း မိုင်းပေါက်ကွဲခဲ့တာကြောင့် ဒဏ်ရာ ရရှိခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
