အလင်း၊ သြဂုတ် ၃၁ ရက်၊ မင်းတပ်
ချင်းပြည်နယ်၊ မင်းတပ်မြို့နယ်၊ တိုက်နယ်အမှတ် (၂)၊ ဝုမ်းခုန်ကျေးရွာကို စစ်ကောင်စီတပ်က လေကြောင်း ဗုံးကြဲတိုက်ခိုက်လို့ ကလေးအပါအဝင် ၈ ဦး သေဆုံးကာ ၁၀ ဦးကျော် ဒဏ်ရာရရှိခဲ့တယ်လို့ ဒေသခံတွေက ရွှေဖီမြေသို့ ပြောပါတယ်။
မနေ့ သြဂုတ်လ ၃၀ ရက် ညနေ ၅ နာရီဝန်းကျင်မှာ မင်းတပ်မြို့နယ်၊ ဝုမ်းခုန်ကျေးရွာရှိ နှစ်နေရာကို စစ်ကောင်စီက ဂျက်ဖိုက်တာ ၂ စီးမှ ပေါင် ၅၀၀ ဗုံးသီးလို့ ယူဆရတဲ့ ဗုံးသီး ၄ လုံးနဲ့ လေကြောင်းကနေ တိုက်ခိုက်ခဲ့တာဖြစ်ပါတယ်။
“ရွာထဲကို ဗုံးသီး ၄ လုံးလောက်နဲ့ ကြဲချသွားတယ်။ ရွာထဲမှာက အရပ်သားတွေ၊ စစ်ဘေးရှောင်တွေပဲ ရှိတာပါ။” လို့ မင်းတပ်ဒေသခံတစ်ဦးက ရွှေဖီမြေသို့ ပြောပါတယ်။
အဲဒီလေကြောင်း တိုက်ခိုက်မှုကြောင့် ကလေးတွေ အပါအဝင် အရပ်သား ၈ ဦး သေဆုံးပြီး အရပ်သား ၁၀ ကျော် ထိခိုက်ဒဏ်ရာရရှိခဲ့တယ်လို့ သိရပါတယ်။
“အားလုံး ၈ ယောက်လောက် သေတယ်။ သေတဲ့ထဲမှာ KG ကလေးငယ်တွေ ပါတယ်။ အမျိုးသား ၄ ယောက် အမျိုးသမီး ၄ ယောက်ပါတယ်။ ၁၀ ယောက်ကျော် ဒဏ်ရာရတယ်။ အဲထဲမှာ ကလေးတွေလည်း ပါတယ်။” လို့ မင်းတပ်ဒေသခံတစ်ဦးက ရွှေဖီမြေသို့ ပြောပါတယ်။
အရပ်သားတွေ ထိခိုက်သေဆုံးတဲ့အပြင် လူနေအိမ် ၂၀ ဝန်းကျင်ခန့်လည်း ပျက်စီးသွားပါတယ်။
မင်းတပ်မြို့နယ်မှာ အခုရက်ပိုင်း စစ်ကောင်စီတပ်က တိုက်ပွဲဖြစ်ပွားတာမရှိဘဲ အရပ်သားတွေ နေထိုင်တဲ့ ကျေးရွာတွေကို လေကြောင်းတိုက်ခိုက်နေတာဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
