ရွှေဖီမြေ၊ ဩဂုတ် ၁၉ ရက်၊ ကွတ်ခိုင်
ရှမ်းမြောက် ကွတ်ခိုင်မြို့ ရပ်ကွက် ၁၊ ၆ နဲ့ ၇ တွေမှာ နေထိုင်တဲ့ ကျောင်းနေအရွယ် အမျိုးသမီးငယ် ၃ ဦးဟာ မိသားစုဝင်တွေနဲ့ အဆက်အသွယ်ဖြတ်ပြီး မူဆယ်မှာ အလုပ်သွားလုပ်ဖို့ ပွဲစားနဲ့ ထွက်သွားခဲ့တာကြောင့် မိသားစုဝင်တွေက လူကုန်ကူးခံရမှာကို စိုးရိမ်နေကြောင်း မိခင်ဖြစ်သူတွေက ရွှေဖီမြေကို ပြောပါတယ်။
အသက် ၁၅ နှစ်အရွယ်ဝန်းကျင်သာ ရှိသေးတဲ့ အဲဒီအမျိုးသမီးငယ် ၃ ဦးဟာ ပြီးခဲ့တဲ့ ဩဂုတ် ၁၁ ရက် ညပိုင်းက မိသားစုဝင်တွေ မသိအောင် ခိုးပြီးထွက်သွားကြတာလို့ ဆိုပါတယ်။
မိခင်ဖြစ်သူ တစ်ဦးက “အကုန်လုံးက ၁၅ နှစ်တွေဘဲ။ ကျောင်းတက်နေတုန်း။ သူ့ကို လာခါ်တဲ့အချိန်က ညဆိုတော့ ထင်တာ အထဲမှာအိပ်နေတာ။ သူ့သူငယ်ချင်းတွေက သူ့ဆီကို လာလည်တာလားပေါ့။ ဘယ်ဟုတ်မလဲ ပြတင်းပေါက်ကနေ ခိုးပြီးထွက်တာ။ သူတို့ကို လာခေါ်တဲ့ အမျိုးသမီးလည်း သူရဲ့ ဆိုင်လိပ်စာတွေ မေးလည်း ဘာမှ မပြောပြဘူး။ ကလေးတွေဆီ ဖုန်းဆက်လည်း တစ်ယောက်မှမကိုင်ကြဘူး” လို့ ပြောပါတယ်။
အဆိုပါ အမျိုးသမီးငယ် ၃ ဦးက လိမ်လည်ခေါ်ဆောင်ခံရတာကြောင့် လူကုန်ကူးခံရမှာကို စိုးရိမ်နေကြတယ်လို့ မိသားစုဝင်တွေက ဆိုပါတယ်။
“သူတို့ကို လာခေါ်တဲ့အချိန်က ကားအမဲရောင်နဲ့ လာခေါ်တာတဲ့။ ကလေးတွေက မှတ်ပုံတင်လည်း မရှိဘူး။ သူတို့ကို လာခေါ်တဲ့ အမျိုးသမီးဆီ ဖုန်းဆက်တယ်။ အစက သူလိမ်ထားတယ်။ မိုင်းလားဘက်မှာတဲ့။ ဆိုင်လိပ်စာပြောဆို မပြောပြဘူး။ ကျွန်မစုံစမ်းရင်းနဲ့ မူဆယ်ဘက်မှာတဲ့။ အဲဒီအမျိုးသမီးကို ပြောတယ်။ ကျမသမီးကို ပြန်လွှတ်ပေး။ မဟုတ်ရင် ဆိုင်လိပ်စာပြော။ ကျမသွားခေါ်မယ်ဆိုလည်း မပြောဘူး။ အခုလို လုပ်တာက ကလေးတွေ လက်ခံလည်း မိဘတွေရဲ့ ခွင့်ပြုချက်မပါဘဲ ခေါ်ခွင့်မရှိဘူး။ ကျမတို့သမီးကို လာပို့ပါ။ လမ်းစရိတ်လည်း ပြန်ပေးမယ်” လို့ မိခင်ဖြစ်သူက ပြောပါတယ်။
အလုပ်ရမယ်ဆိုပြီး ပွဲစားတွေရဲ့ လိမ်လည်မှုကြောင့် မူဆယ်ဖက်ကို ရောက်ရှိလာကြတဲ့ အနယ်နယ် အရပ်ရပ်က အမျိုးသမီးငယ်တွေ အများအပြားရှိနေပြီး အဆက်အသွယ်မရေတာ့ပဲ ပျောက်ဆုံးနေသူတွေလည်း ရှိကြောင်း သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
