အလင်း၊ ဧပြီ ၉ ရက်၊ မင်းပြား
ရခိုင်ပြည်နယ် မင်းပြားမြို့နယ် ပုလဲတောင်ရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အမျိုးသားတစ်ဦး သေဆုံးပြီး ဆယ်ကျော်သက် လူငယ်တစ်ဦး ဒဏ်ရာ ရရှိခဲ့တယ်လို့ ဒေသခံတွေက ရွှေဖီမြေသို့ ပြောပါတယ်။
မနေ့ ဧပြီ ၈ ရက် မနက် ၈ နာရီခွဲခန့်မှာ ဂျက်ဖိုက်တာ နှစ်စီးနဲ့ Y-12 လေယာဉ် နှစ်စီး အသုံးပြုပြီး ပုလဲတောင်ရွာနဲ့ အနီးဝန်းကျင်ကို ဗုံးအလုံးအရင်းနဲ့ ကြဲချခဲ့တာပဲ ဖြစ်ပါတယ်။
“လေယာဉ် လေးစီးနဲ့ ဗုံးအလုံးအရေ အများကြီးနဲ့ ကြဲချသွားတာပါ။ ရွာအနီးအနားမှာ ကျပေါက်ကွဲလို့ ရွာထဲဆိုရင် ထိခိုက်မှု ပိုများမယ်။ အခုက အရပ်သားတစ်ဦး သေဆုံးပြီး တစ်ဦးဒဏ်ရာရတယ်” လို့ မင်းပြားဒေသခံတစ်ဦးက ရွှေဖီမြေသို့ ပြောပါတယ်။
ပုလဲတောင်ရွာမှာ စစ်ရေးလှုပ်ရှားမှု မရှိဘဲ စစ်တပ်က အရပ်သားတွေနေထိုင်တဲ့ ကျေးရွာကို လေကြောင်းကနေ အကြောင်းမဲ့ ဗုံးကြဲတိုက်ခိုက်ခဲ့တာပဲ ဖြစ်ပါတယ်။
အဆိုပါ တိုက်ခိုက်မှုကြောင့် ပုလဲတောင်ရွာမှ ဦးမျိုးချစ်ခေါ် အမဲ (၃၅ နှစ်) သေဆုံးပြီး မောင်သန်းဝင်းမောင် (၁၅ နှစ်)က ထိခိုက်ဒဏ်ရာ ရရှိခဲ့ကာ လက်ရှိ ဒဏ်ရာရရှိသူကို အရေးပေါ် ဆေးကုသပေးနေရတယ်လို့ သိရပါတယ်။
ဒါ့အပြင် လေကြောင်းတိုက်ခိုက်မှုကြောင့် လူနေအိမ်တချို့နဲ့ ရွာစာသင်ကျောင်းဆောင်လည်း ဗုံးစထိမှန်ပျက်စီးခဲ့တယ်လို့ သိရပါတယ်။
ပြီးခဲ့တဲ့ ဧပြီ ၁ ရက်ကလည်း သံတွဲမြို့နယ်ရှိ ခလရ(၅၅) စခန်းဟောင်းအနီးကို စစ်တပ်က လေကြောင်းကနေ ဗုံးကြဲခဲ့ရာ စစ်ဘေးရှောင် မိသားစုတစ်စုလုံး သေဆုံးခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
