ရွှေဖီမြေ၊ ဩဂုတ် ၁၇ ရက်၊ ပန်ဆန်း
“ဝ”ပြည် တရားရေးကော်မတီ- WSP က ထိန်းချုပ်နယ်မြေအတွင်း ဖမ်းဆီးရမိတဲ့ မူးယစ်ဆေးဝါး (ICE, Heroin, Ephedrine) စုစုပေါင်း ၁၇.၂ ကီလိုဂရမ်ကို တရုတ်ထံ ထပ်မံ လွှဲပြောင်းပေးခဲ့ကြောင်း ထုတ်ပြန်ချက်အရ သိရပါတယ်။
မူးယစ်ဆေးဝါးတွေကို တရုတ်နိုင်ငံက ပေးပို့တဲ့ သတင်းအချက်အလက်ပေါ် အခြေခံပြီး နှစ်ဖက်ရဲတပ်ဖွဲ့ ပူးပေါင်းဖမ်းဆီးနိုင်တာဖြစ်ပြီး မူးယစ်ဆေးဝါးနဲ့ ထုတ်လုပ်ရာမှာ အသုံးပြုတဲ့ ပုံစံခွက် ၂၀ ခု၊ လေစုပ်ထုပ်ပိုးစက် ၅ လုံး၊ အခြောက်ခံစက် ၁ လုံးနဲ့ ထုတ်ပိုးအိတ် ၆ အိတ်တို့ကို တရုတ်ထံ လွှဲပြောင်းပေးခဲ့တယ်လို့ ဖော်ပြထားပါတယ်။
မူးယစ်ဆေးဝါးတွေကို “ဝ”ပြည် နယ်စပ်ဒေသတွေမှာ ဖမ်းဆီးရမိတာဖြစ်တယ်လို့ ဖော်ပြထားပေမဲ့ တည်နေရာအတိအကျ မဖော်ပြထားသလို မူးယစ်ဆေးဝါးနဲ့ ဆက်စပ်သူတွေကို ဖမ်းဆီးခြင်း ရှိမရှိလည်း ဖော်ပြတာ မရှိပါဘူး။
စစ်ကောင်စီ ထုတ်ပြန်ဖူးတဲ့ မူးယစ်ဆေးဝါးတန်ဖိုးအရ “ဝ”တပ် တရုတ်ထံ လွှဲပြောင်းပေးခဲ့ စိတ်ကြွဆေး (ICE/Methamphetmine) ၆.၇ ကီလိုဂရမ်၊ ဘိန်းဖြူး(Heroin) ၇.၈ ကီလိုဂရမ်၊ အက်ဖီဒရင်း ၂.၅ ကီလိုဂရမ်တို့ရဲ့ ကာလတန်ဖိုးဟာ ကျပ်သိန်း ၄,၄၀၀ အထက်မှာ ရှိပါတယ်။
“ဝ”ဟာ ပြီးခဲ့တဲ့ ဖေဖော်ဝါရီ ၁၅ ရက်မှာ စိတ်ကြွဆေး (Methamphetamine) ၁၆၂၂.၉ ကီလိုဂရမ် ကာလတန်ဖိုး ကျပ် ၁၂ ဘီလျံ၊ မေလ ၂၇ ရက်မှာ မူးယစ်ဆေးဝါးမျိုးစုံ ၃၇၀.၂၇၆ ကီလိုဂရမ် ကာလတန်ဖိုး ကျပ် ၁ ဘီလျံကျော်တို့ကို တရုတ်ထံ လွှဲပြောင်းပေးခဲ့ဖူးပြီး လက်ရှိအကြိမ်ဟာ ၂၀၂၆ ခုနှစ်အတွင်း ၃ ကြိမ်မြောက် မူးယစ်ဆေးဝါး လွှဲပြောင်းပေးမှု ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
