ပျားကြီး၊ ဇူလိုင် ၁၈၊ မန္တလေး
မန္တလေးမြို့ပေါ်ရပ်ကွက်တွေမှာ စစ်မှုထမ်းတိမ်းရှောင်ဖို့အတွက်ငွေကြေးပေးဆောင်ပြီးတိမ်းရှောင်သူတွေ များပြားလာတာကြောင့် စစ်မှုထမ်းမဲနှိုက်ရွေးချယ်မှု အသစ်တွေ ထပ်မံလုပ်လာတယ်လို့ဒေသခံတွေက ပြောပါတယ်။
ပြီခဲ့တဲ့ရက်ပိုင်းအတွင်းကစပြီး စစ်မှုထမ်းမဲနှိုက်ရွေးချယ်မှုတွေကို မန္တလေးတစ်မြို့လုံးမှာ ပြုလုပ်နေတာဖြစ်ပါတယ်။
“အုပ်ချုပ်ရေးအဖွဲ့တွေက အသစ်တွေဖြစ်တော့ ငွေရှာတဲ့သဘောပေါ့။ အဲ့ဒီစစ်မှုထမ်းရှောင်တာကနေရတဲ့ဝင်ငွေရပေါက်ရလမ်းက သိန်းရာချီရှိတာလေ။နောက်ပြီးစစ်တပ်အတွက်က အသေခံမယ့် လူအရေးပေါ်လိုအပ်နေတာ။ အဲ့ဒီတော့ငွေပေးပြီးရှောင်ထားတဲ့သူတွေကိုမဲပြန်နှိုက်တဲ့သဘောပါ။ ရှောင်မယ့်သူတွေကလည်း မဲတောင်မနှိုက်ဘူး စစ်တပ်ကကောင်တွေနဲ့ချိတ်ပြီးရှောင်ဖို့လုပ်နေကြပြီ။ ဘာအဆက်အသွယ်မှ မရှိတဲ့သူတွေကတော့ သေချာပေါက်သွားရမှာပေါ့ “လို့အောင်မြေသာစံမြို့နယ် ဒေသခံအမျိုးသားတစ်ဦးက ပြောပါတယ်။
မန္တလေးမြို့ပေါ် အောင်မြေသာစံ၊ ချမ်းအေးသာဇံ၊ မဟာအောင်မြေနဲ့ ပြည်ကြီးတံခွန်မြို့နယ်တွေမှာစစ်မှုထမ်းဖို့မဲနှိုက်မှုတွေကို အခုသီတင်းပတ်ကစပြီး အင်တိုက်အားတိုက် ပြန်လည်လုပ်ဆောင်နေတာ ဖြစ်ပါတယ်။
နေရာအနှံ့အပြားမှာ စစ်ရှုံးမှုနဲ့စစ်သားပြုန်းတီးမှုဒဏ်ကို အလူးအလဲခံနေရတဲ့ အကြမ်းဖက်စစ်တပ်ဟာ ၂ နှစ်တာကာလအတွင်း မန္တလေးမြို့ပေါ်ကလူငယ်ထောင်နဲ့ချီပြီး စစ်မှုထမ်းဖို့အဓမ္မခေါ်ဆောင်ခဲ့ပေမဲ့ စစ်မှုထမ်းပြန်လာသူ ၁၀၀ ဝန်းကျင်ပဲရှိတယ်လို့ ဒေသတွင်းစစ်ရေးသတင်းရင်းမြစ်ကဆိုပါတယ်။
အခုမဲနှိုက်မှုကနေ စစ်မှုထမ်းရှောင်တိမ်းဖို့အတွက် လူတစ်ဦးကို ငွေကျပ် သိန်း ၂၀ ကနေ ရာနဲ့ချီတောင်းဆိုပြီး ယာယီကင်းလွတ်ဖို့ ရပ်ကျေးအုပ်ချုပ်ရေးအဖွဲ့တွေက လုပ်ဆောင်ပေးနေတယ်လို့ ဒေသခံတွေကဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
