ပပ၊ ဇွန်လ ၂၈ ရက်၊ လားရှိုး
ရှမ်းမြောက် လားရှိုးမြို့နယ် အီနိုင်းရွာခံ ၄ ဦးကို မူးယစ်ဆေးဝါး သုံးစွဲမှုနဲ့ ကိုးကန့်တပ်က ဖမ်းဆီးခေါ်ဆောင်သွားပြီးနောက် စစ်ယူနီဖောင်း ဝတ်ဆင်ခိုင်းပြီး ဂိတ်စောင့်အဖြစ် လုပ်နေရကြောင်း ကိုယ်တိုင်မြင်တွေ့ခဲ့ရသူ အမျိုးသမီးရဲ့ ပြောပြချက်အရ သိရပါတယ်။
ပြီးခဲ့တဲ့ မေလ ပထမအပတ်က အီနိုင်းရှိ ဒေသခံ အမျိုးသား ၄ ဦးကို မူးယစ်ဆေးဝါး သုံးစွဲတယ်ဆိုပြီး ဖမ်းဆီးခေါ်ဆောင်သွားသူ အသက် ၂၀ ကျော်အရွယ် အမျိုးသား ၃ ဦးဟာ နမ့်ပေါင်၊ ခေးနင်းနဲ့ အီနိုင်း စတဲ့နေရာရှိ စစ်ဆေးရေးဂိတ်မှာ စစ်ယူနီဖောင်း ဝတ်ဆင်ပြီး ဂိတ်စောင့် လုပ်နေရတာပဲ ဖြစ်ပါတယ်။
ကိုယ်တိုင်မြင်ခဲ့ရသူ အမျိုးသမီးက “ရွာမှာ လာဖမ်းတဲ့အချိန် မူးယစ်ဆေးဝါး ဖြတ်ပေးမယ်ပြောလို့ မိဘတွေက စိတ်ချလက်ချ ထည့်ပေးကြတာ။ ဟိုတလောက နမ့်ပေါင် သွားရင်းနဲ့ လမ်းမှာ အဲကလေးတွေကို စစ်သားဝတ်စုံနဲ့ သေနတ်ကိုင်နေတာ တွေ့တယ်” လို့ ပြောပါတယ်။
၎င်းဖြစ်စဉ်ဟာ မဖြစ်သင့်ကြောင်းနဲ့ မိသားစုဝင်တွေကို အကြောင်းကြားပေးသင့်ကြောင်း အထက်ပါအမျိုးသမီးက ပြောဆိုပါတယ်။
အလားတူ ပြီးခဲ့တဲ့ မတ်လကလည်း လားရှိုးမြို့နယ် အီနိုင်းနဲ့ ဆယ်မိုင်ကုန်းဒေသခံအပြင် ခရီးသွားသူတွေကို MNDAA က မူးယစ်ဆေး သုံးစွဲမှု ရှိမရှိ စစ်ဆေးဖမ်းဆီးခဲ့ပြီး တချို့ကိုတော့ ပြန်လွှတ်ပေးခဲ့ပေမဲ့ အများစုကိုတော့ စစ်မှုထမ်းဖို့ ပို့ခဲ့ကြောင်း ပြန်လွှတ်လာသူတွေက ရွှေဖီမြေကို ပြောပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
