မြတ်နိုး၊ ဇွန်လ ၂၉ ရက်၊ ဖားကန့်
ကချင်ပြည်နယ် ဖားကန့်မြို့နယ် ဆိပ်မူကျေးရွာအုပ်စု နမ့်မှော်ရွာ သုံးသိန်းမှော် ကျောက်စိမ်း တူးဖော်ရေးနယ်မြေမှာ မနေ့ ဇွန်လ ၂၈ ရက် မနက်အစောပိုင်းက မြေစာပြိုကျမှု ဖြစ်ပွားခဲ့ပြီး ပိမိသေဆုံးခဲ့သူ ၇ ဦးအနက် ၅ ဦးရဲ့ အလောင်းတွေကို ရှာဖွေတွေ့ရှိထားပေမဲ့ ကျန် ၂ ဦးကိုတော့ ရှာဖွေနေဆဲဖြစ်တယ်လို့ ဒေသခံတွေဆီက သိရပါတယ်။
“ဖားကန့် နမ့်မှော် ကျောက်စိမ်းနယ်မြေမှာ မြေစာ ပြိုကျတာပါ။ သေဆုံးသူ ၇ ယောက်ထဲက ၅ ယောက်ရဲ့အလောင်းကို ရှာတွေ့ထားပါတယ်။ နောက်ထပ် ၂ ယောက်ရဲ့ အလောင်းတော့ ရှာမတွေ့သေးဘူး” လို့ ဒေသခံ အမျိုးသားတစ်ဦးက ပြောပါတယ်။
မြေစာ ပြိုမှုဟာ ဇွန်လ ၂၈ ရက် မနက် ၁ နာရီဝန်းကျင်မှာ ဖြစ်ပွားခဲ့တာဖြစ်ပြီး ကယ်ဆယ်ရေးအဖွဲ့နဲ့ ဒေသခံတွေက ပျောက်ဆုံးနေသူကို ဆက်လက် ရှာဖွေနေတယ်လို့ သိရပါတယ်။
“အခု မိုးရာသီဆိုတော့ ကမ်းပါးတွေ၊ မြေစာပုံတွေက အချိန်မရွေး ပြိုကျနိုင်တယ်။ ရေမဆေး ရှာဖွေသူတွေအနေနဲ့ အရမ်းအန္တရာယ်များတဲ့အတွက် သတိထားကြစေချင်ပါတယ်” လို့ နောက်ထပ် ဒေသခံအမျိုးသားတစ်ဦးက ပြောပါတယ်။
ဖားကန့် ကျောက်စိမ်း တူးဖော်ရေးနယ်မြေမှာ မိုးရာသီရောက်တိုင်း မိုးသည်းထန်စွာ ရွာသွန်းမှုကြောင့် မြေစာပုံ ပြိုကျတာ၊ ကမ်းပါး ပြိုကျတာတွေ မကြာခဏ ဖြစ်ပွားလေ့ရှိပြီး ရေမဆေးကျောက် ရှာဖွေသူအပါအဝင် လူသေဆုံးမှု နှစ်စဉ် ဖြစ်ပွားနေပါတယ်။
ဇွန်လအတွင်း ဖားကန့်ဒေသမှာ မိုးအဆက်မပြတ် ရွာသွန်းပြီး ရေကြီးရေလျှံမှုနဲ့ မြေပြိုနိုင်တဲ့အန္တရာယ် မြင့်တက်နေကြောင်း ဒေသခံတွေက ပြောဆိုထားပါတယ်။
ဖားကန့်ကျောက်စိမ်းနယ်မြေမှာ ၂၀၁၈ ခုနှစ်ကစပြီး မြေစာပြိုမှု ဆက်တိုက် ဖြစ်ပွားခဲ့ရာ လူရာနဲ့ချီ သေဆုံးခဲ့ပြီး မိုးရာသီအတွင်း ရေမဆေးကျောက် ရှာဖွေသူတွေအတွက် အန္တရာယ်အများဆုံး ဒေသတစ်ခုအဖြစ် သတ်မှတ်ခံထားရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
