ရှမ်းပြည်မြောက်ပိုင်း ကျောက်မဲမြို့နယ် ပန်စံကျေးရွာအုပ်စုဟာ လက်ဖက်စိုက်ပျိုးရေးကို အဓိက အားထားပြီးတော့ အသက်မွေးဝမ်းကြောင်းပြုနေတဲ့ဒေသတစ်ခု ဖြစ်ပါတယ်။
ဒါပေမဲ့ လက်ရှိမှာတော့ လက်ဖက်အစို တစ်ပိဿာကို ၂,၂၀၀ ကျပ်ဝန်းကျင်သာ ရရှိနေပြီး အရင်နှစ်တွေက ၅ ထောင်နီးပါးအထိ ရရှိခဲ့တဲ့ ဈေးနှုန်းနဲ့ နှိုင်းယှဉ်ရင် ထက်ဝက်ကျော် ကျဆင်းလာတယ်လို့ ဒေသခံတွေက ပြောပါတယ်။
လက်ဖက်ဈေး ကျဆင်းလာတဲ့အချိန်မှာပဲ ဆန်၊ ဆီနဲ့ အခြေခံ စားသောက်ကုန်ဈေးနှုန်းတွေကတော့ ဆက်တိုက် မြင့်တက်လာတာကြောင့် ကျေးလက်မိသားစုတွေရဲ့ စားဝတ်နေရေးဟာ ပိုမိုခက်ခဲလာနေပါတယ်။
အထူးသဖြင့် မိသားစု စားဝတ်နေရေးကို ဦးဆောင်စီမံနေရတဲ့ အမျိုးသမီးတွေအတွက် ဝင်ငွေနဲ့ ထွက်ငွေ မမျှတော့ဘဲ နေ့စဉ်ဘဝကို ခက်ခက်ခဲခဲ ရုန်းကန်ဖြတ်သန်းနေကြရပါတယ်။
