ပိုႈလဘား၊ ကျံရ်အေပ်ြုရ် ဆငည်း 7၊ နောင်ခေဝ်
တိုအီးအရာပ် ကောန်အီမာည်းအူအီး က္လာင်းဒါႈ ဒီႎီရ်ထိင်ခြဲ တံပ်ကညာအာဏာဆီုက်ဇေဝ်ကဲ ပကပီုန်ဆျှံမ်ကဒါႇပိူည် ခေဲင်လှံင်နောင်ခေဝ်နီန် ဂေါႇမိုႈကဲငျားဒေလိုက်ဟာဝ်းမဴင်နီန် ကောန်အီမာည်းအူအီး ယံမ်းဟာဝ်းဖါ်ႈ ကောန်အီပ်ုန်အူအီးစီ ကတူႈဖေးဘာတ်ဟာဝ်းအောႏ။
အ်ုန်အီဂေါည် ခေဲင်လှံင်နောင်ခေဝ် ခမိုရဝ်ညောတော တိုအီးရဝ်ယာပြင် ကောန်အီမာည်း ကဝ်အီဘိူန်းအဆာက် 67 ဆန်ုမ်ကာည်း ကောန်အီပ်ုန် ကဝ်အီဘိူန်းအဆာက် 78 ဆန်ုမ်နီန် ခည်ကျံရ်မာချှ် ဆငည်း 29 ဒိူန် ခိင်ရေဲန်ကဲတ ဆပဲဆငါးခေဲင်လိုင်းကဲ စီငျားဒေလိုက်ဟာဝ်းမဴင်နီန် ပဲန်ပဒူႈဟာဝ်းအောႏ။
တိုအီးအရာပ် ကောန်အီမာည်းအူအီး က္လာင်းဒါႈ “ ခိင်ရေဲန်ကဲဆပဲဆငါး ခေဲင်လိုင်းကဲနီန် စီငျားလိုက်ဟာဝ်းမဴင်ဒီန် ဒါလာႇလိုက်နီန်။ ကောန်အ်ုန်နီန် ဂေါႇမိုႈဟည်လအဆိုက်အ်ုန် အာည်ႇရောတ်ပယုင်ဆနံမ် တောပ်ဒေင်အူကဒည်နီန် အ်ုန်ယံမ်းဟာဝ်း။ ဆာ်မိုႈမာအ်ုန်စီ လဇိူင်အ်ုန်ကာည်းတည်အ်ုန်”။
ကဲဒါႈ ဂေါႇမဴင်ပဒူႈဒီန် ကောန်အီပ်ုန် ကဝ်အီကတူႈဖေးဘာတ်ဒီန် ကဇေန်နီး အ်ုန်ရံပ်ခါမ်ဘည်ဆနံမ်း ပယုင်ဆနံမ်ဒါင်းနောင်ခေဝ်အောႏ။
ခည်ကျံရ်မာချှ် ဆငည်း 28 ဒိူန်မာ် ပလှံင်နောင်ခေဝ်နီန် တိုအီးရဝ်မတ်လွတ် ကဝ်အီဇီုဝ် ဒေါ်တီတာမွေး ဘိူန်းအဆာက် 39 ဆန်ုမ်နီန် ခိင်ရေဲန်အ်ုန်တ ဆပဲဆငါးရအာည်ႇဂါင်အ်ုန် ရီမ်းပြောဒေင်ဒါင်းနီန် ငျားဖါ်ႈဒေကိုႈဟာဝ်းမဴင်နီန် ပဲန်ဖါ်ႈပဒူႈ လဟာဝ်းအ်ုန်အောႏ။
ကဲဒဲႈဆဒိဒါႈ အ်ုန်အီမိုႈ ဒီပဲန်ကရဲင်ဟောည်ႇ ပ္လေါည်ကတီုက်ကပဴင် ပကပီုန်ဆျှံမ်ကဒါႇပိူည် ခေဲင်လှံင်နောင်ခေဝ်မာ် ဂေါႇမိုႈအ်ုန်တောပ်ခေဲင်လှံင်အူလှံင်နီန် စီပဲန်အ်ုန်ဂေါည်ဂေါည်ငျား ဒေညဲ့ဟာဝ်းမဴင်ကဲနီန်အောႏ။
ခေဲင်ကပီုန်ဆျှံမ် ကဒါႇပိူည်နီန် တောပ်ဘည်စြာင်းပ်ုန်ကစုအူန်း ဖုင်ယဲဆျှိုည်ဖီမျေ ခေဲင်ဆန်ုမ် 2025 နီန် ဂေါႇမဴင်ပ်ုန်တီႇခေဲင်ကတာည်းနီန် တောပ်ပည်ကောန်ကညောမ် 2 အီး 9 အီးယံမ်းဟာဝ်းဖါ်ႈ တောပ်ပည် ကောန်ကညောမ် 6 အီးနီန် 27 အီးကတူႈဖေးဘာတ်ဟာဝ်းအောႏ။
ကဝ်အီကပ္လါႇဆဒါင် – လိုည်ပိုႈဆပေ
~ ~ ~
ဆဒါင်ဖုင်ယဲဆျှိည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
