ရွှေဖီမြေ၊ ဇူလိုင် ၁၇ ရက်၊ လားရှိုး
စစ်ကောင်စီတပ် ပြန်ထိန်းချုပ်ထားတဲ့ ရှမ်းမြောက် လားရှိုးမြို့ ရပ်ကွက် (၁) မှာ ဆိုင်ကယ်ခိုးယူနေတဲ့ အမျိုးသားတစ်ဦးကို မြို့ခံတွေ ဝိုင်းဖမ်းနိုင်ခဲ့တယ်လို့ လားရှိုးမြို့ခံတွေဆီက သိရပါတယ်။
မနေ့ ဇူလိုင် ၁၇ ရက် မနက် ၁၀ နာရီဝန်းကျင်မှာ လားရှိုးပန်းခြံအနီး ဆိုင်ကယ်ခိုးယူနေတဲ့ အမျိုးသားကို မြို့ခံတွေ ဝိုင်းဖမ်းခဲ့တာဖြစ်ပြီး စစ်ကောင်စီရဲ့ ရဲတပ်ဖွဲ့ထံ အပ်နှံထားတယ်လို့ လားရှိုးမြို့ခံ အမျိုးသားတစ်ဦးက ရွှေဖီမြေကို ပြောပါတယ်။
“ဒီနေ့မှာ ဆိုင်ကယ်သူခိုးတစ်ယောက် ဖမ်းမိတယ်။ သူတို့အဖွဲ့က လူကိုလည်း ဆိုင်ကယ်နဲ့ တိုက်သေးတယ်။ ဆိုင်ကယ်လည်း လုသွားတယ်။ တစ်ယောက်ပဲ ဖမ်းမိတာ။ ကျန်တဲ့သူတွေတော့ လွတ်သွားတယ်။” လို့ ဆိုပါတယ်။
လားရှိုးမြို့ကို စစ်ကောင်စီတပ် ထိန်းချုပ်ပြီးနောက် ကားနဲ့ ဆိုင်ကယ်ခိုးယူခံရတဲ့ ဖြစ်စဉ်တွေ မကြာခဏ ဖြစ်ပွားနေပြီး စစ်ကောင်စီဘက်က ထိရောက်တဲ့ အရေးယူမှု မရှိဘူးလို့ မြို့ခံတွေက ဆိုကြပါတယ်။
ပြီးခဲ့တဲ့ ဇူလိုင် ၁၄ ရက်ကလည်း လားရှိုးမြို့ ရပ်ကွက် (၇) မှာ မြို့ခံတစ်ဦးရဲ့ ကားကို ခိုးယူနေတဲ့ အမျိုးသားတစ်ဦးကို မြို့ခံတွေ ဝိုင်းဖမ်းနိုင်ခဲ့ပါတယ်။
ဒါ့အပြင် ပြီးခဲ့တဲ့ ဇူလိုင် ၇ ရက် ညနေပိုင်းကလည်း ရပ်ကွက် (၅) ရှိ နေအိမ်တစ်အိမ်မှာ အမျိုးသား ၃ ဦးက ဆိုင်ကယ်ကို လုယက်ဖို့ ကြိုးစားစဉ် အိမ်ရှင်ဖြစ်သူက ဓားနဲ့ လိုက်လံခုတ်သတ်ခဲ့လို့ တစ်ဦး သေဆုံးခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
