ရွှေဖီမြေ၊ မတ်လ ၂၇ ရက်
လွန်ခဲ့တဲ့ ၂ဝ၂၁ခုနှစ် မတ်လ ၂၇ရက် တပ်မတော်နေ့မှာ စစ်အာဏာရှင်အလိုမရှိကြောင်း အေးချမ်းစွာ ဆန္ဒပြကြတဲ့ အပစ်မဲ့ပြည်သူ ရာနဲ့ချီကို စစ်တပ်က ၁ရက်တည်း ရက်ရက်စက်စက်သတ်ဖြတ်ခဲ့ပါတယ်။
အဲသတ်ဖြတ်ခံရတဲ့အထဲမှာ ရှမ်းပြည်နယ်မြောက်ပိုင်းရဲ့ မြို့တော် လားရှိုးဆန္ဒပြပွဲတွေကို ဦးဆောင်ခဲ့သူတစ်ယောက်ဖြစ်တဲ့ မိုင်းမင်းနောင်လည်း ပါဝင်ခဲ့ပါတယ်။
မိုင်းမင်းနောင်ဟာ စစ်တပ်အာဏာသိမ်းယူပြီးကတည်းက လားရှိုးမြို့တွင်းထဲမှာ ပထမဆုံး ဦးဆောင်ပြီး ရှေ့ထွက်ဆန္ဒပြတဲ့ထဲက လူငယ်တစ်ဦးဖြစ်ပြီး အာဏာသိမ်းတဲ့ရက်ကနေ သူကျဆုံးခဲ့တဲ့ နေ့အထိ တစ်ရက်မှမပျက်ကွက်ပဲ နည်းအမျိုးမျိုးနဲ့ တွေးတောကြံစည်ပြီး ဆန္ဒပြပွဲကို ဦးဆောင်ခဲ့ပါတယ်။
အသက် ၂၂အရွယ်သာ ရှိသေးတဲ့ မိုင်းမင်းနောင်ဟာ လားရှိုးတက္ကသိုလ်မှာ ဥပဒေဘာသာရပ်နဲ့ နောက်ဆုံးနှစ်အဖြစ် ကျောင်းတက်နေသူဖြစ်ပြီး တအာင်းဥပဒေအထောက်အကူအဖွဲ့မှာလည်း တာဝန်ထမ်းဆောင်နေတဲ့ လူငယ်ဖြစ်ပါတယ်။
မတ်လ ၂၇ရက်နေ့ မနက် ၇နာရီ ၅ဝမိနစ်မှာတော့ တပ်မတော်နေ့မှာ အကြီးအကျယ်ဆန္ဒပြဖို့ စုဝေးနေချိန် စစ်တပ်က စနိုက်ဘာနဲ့ သူ့ရင်ဘတ်တည့်တည့်ကိုချိန်ပြီး ပစ်သတ်ခဲ့ပါတယ်။
အဲလို ပစ်သတ်ခဲ့ရုံမက စစ်တပ်ဟာ သူ့အလောင်းကို လုယူဖို့ကြိုးစားခဲ့ပြီး လားရှိုးမြို့ထဲက အချိန်မှီသယ်ထုတ်နိုင်တာကြောင့် အလောင်းကိုတော့ စစ်တပ်က မရသွားခဲ့ပါဘူး။
မိုင်းမင်းနောင်ကို ပစ်သတ်ခဲ့တဲ့ အချိန်နဲ့တစ်ပြိုင်နက် စစ်တပ်ဟာ ဆန္ဒပြဖို့လုပ်နေတဲ့ အခြားလူငယ် ၃ဦးကိုလည်း ပစ်သတ်ခဲ့ပြီး အဲ ၃ဦး အလောင်းကိုတော့ လုယူသွားခဲ့ပြီးမှ မိသားစုတွေထံ ပြန်ပေးခဲ့ပါတယ်။
မိုင်းမင်းနောင်ရဲ့ အလောင်းကိုတော့ သူ့ရဲ့မွေးရပ်ဇာတိမြေဖြစ်တဲ့ နမ့်ဆန်မြိုကနယ်ကို ယူဆောင်သွားပြီး သူရဲ့ အုပ်ဂူကိုတော့ ကျေးရွာခံတွေက “နွေဦးတော်လှန်ရေး သူရဲကောင်း”ဆိုပြီး မှတ်တမ်းတင်ထားလျက်ရှိပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
