ရွှေဖီမြေ၊ ဧပြီ ၁၂ ရက်၊ လားရှိုး
ရှမ်းမြောက် လားရှိုးမြို့နယ်ထဲ ခရီးသည်တင်ကားတစ်စီး အရှိန်မထိန်းနိုင်တာကြောင့် တိမ်းမှောက်ပြီး ခရီးသည် ၄ ဦး သေဆုံးခဲ့ကြောင်း ကိုယ်တိုင်မြင်တွေ့ခဲ့ရသူတွေရဲ့ ပြောပြချက်အရ သိရပါတယ်။
မနေ့ ဧပြီ ၁၁ ရက် နေ့လယ် ၂ နာရီဝန်းကျင်က လားရှိုးမြို့နယ် ခေးနင်းရွာ ရပ်ကွက် ၃ မှာ ခရီးသည် ၁၂ ဦး တင်လာပြီး လားရှိုး-မန္တလေး ပြေးဆွဲတဲ့ ခရီးသည်ကားတစ်စီး တိမ်းမှောက်ခဲ့တာပဲ ဖြစ်ပါတယ်။
ဖြစ်စဉ်မြင်ခဲ့ရသူ အမျိုးသားက “ကြည့်ရတာတော့ အရှိန်နဲ့ မောင်းလို့ဖြစ်မယ်။ ဘရိတ် ပေါက်တာလား၊ ဘီးပေါက်တာလား သေချာတော့ မသိဘူး။ အဲဒါကြောင့် မှောက်တာ” လို့ ပြောပါတယ်။
သတင်းရေးသားနေချိန် ဒီနေ့မနက်အထိ သေဆုံးသူ အမျိုးသား ၂ ဦး၊ အမျိုးသမီး ၂ ဦးရှိပြီး ဒဏ်ရာရသူ ၈ ဦးကိုတော့ လားရှိုးပြည်သူ့ဆေးရုံသို့ ပို့ဆောင်ခဲ့ကြောင်း သူက ဆက်ပြောပါတယ်။
အလားတူ မနေ့မနက် ၁၀ နာရီဝန်းကျင်ကလည်း ကွတ်ခိုင်မြို့နယ် နမ့်ဖတ်ကာရွာအနီးမှာ မန္တလေး-မူဆယ်သို့ ပြေးဆွဲနေတဲ့ ခရီးသည်ကားတစ်စီး ချောက်ထဲကျလို့ ခရီးသည် ၅ ဦး သေဆုံးခဲ့ပြီး ၁၃ ဦး ဒဏ်ရာ ရခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
