မိုင်းရူပ၊ ဧပြီ ၂၆ ရက်၊ မူဆယ်
ရှမ်းမြောက် တရုတ်-မြန်မာနယ်စပ် မူဆယ်မြို့မှာ အလုပ်ရမယ်ဆိုပြီး ရှမ်းတောင် မိုင်းကိုင်မြို့နယ်က တအာင်းလူမျိုး အမျိုးသမီးတစ်ဦး တရုတ်မယားအဖြစ် စေခိုင်းခံရပြီး မလုပ်နိုင်တာကြောင့် မူဆယ်မြို့မှာ ၁ လကျော်ကြာ အလုပ်အကိုင်မရှိဘဲ နေထိုင်ခဲ့ရတယ်လို့ ရွှေဖီမြေက စုံစမ်းသိရှိရပါတယ်။
မိုင်းကိုင်မြို့နယ် နောင်ခမ်းကျေးရွာမှာ နေထိုင်တဲ့ အသက် ၃၀ ကျော်အရွယ် အမျိုးသမီးတစ်ဦးဟာ အဒေါ်ဖြစ်သူက မူဆယ်မှာ အလုပ်ရမယ်ဆိုပြီး ပြီးခဲ့တဲ့ မတ်လထဲမှာ ခေါ်ဆောင်လာကာ မူဆယ်မြို့ကို ရောက်ရှိချိန် တရုတ်မယားအဖြစ် လုပ်ခိုင်းခဲ့ရရာ မလုပ်နိုင်တာကြောင့် အဒေါ်ဖြစ်သူက အဆက်အသွယ် ဖြတ်ခဲ့တယ်လို့ သိရပါတယ်။
အဲဒီနောက် အဲဒီအမျိုးသမီးနှင့် ၎င်းနဲ့ လိုက်ပါလာတဲ့ အသက် ၄ နှစ်အရွယ် သားဖြစ်သူဟာ ပြန်လမ်းစရိတ် မရှိတာကြောင့် မူဆယ်မြို့မှာ ၁ လကျော်ကြာ နေထိုင်ခဲ့ရတယ်လို့ ကာယကံရှင် အမျိုးသမီးက ပြောပါတယ်။
“အဒေါ်က ခေါ်လာတာ။ မူဆယ်ရောက်တော့ တရုတ်မယား လုပ်ခိုင်းတာ။ ကျမက မလုပ်ချင်ဘူး။ ကျမကို အဆက်အသွယ် ဖြတ်လိုက်တာ။ အခုက ပြန်ဖို့လည်း လမ်းစရိတ် မရှိတော့ဘူး။ နေစရာနေရာလည်း မရှိဘူး” လို့ ဆိုပါတယ်။
ဒီနေ့ ဧပြီ ၂၆ ရက်မှာတော့ မူဆယ်အခြေစိုက် လူမှုကူညီရေးအသင်းတစ်ခုရဲ့ အကူအညီနဲ့ ၎င်းတို့ရပ်ဖြစ်တဲ့ မိုင်းကိုင်မြို့နယ်ဘက်ကို ပို့ဆောင်ပေးလိုက်ပြီလို့ လူမှုကူညီရေးအသင်းရဲ့ တာဝန်ရှိသူတစ်ဦးက ရွှေဖီမြေကို ပြောပါတယ်။
“အဲဒီသားအမိနှစ်ယောက်ကို နေရပ်ပြန်ဖို့ ကူညီပေးလိုက်ပြီ။ အခု လားရှိုးကနေတစ်ဆင့် မိုင်းကိုင်ဘက်ကို ပြန်သွားပြီ”
မူဆယ်မြို့မှာ အလုပ်ရမယ်ဆိုပြီး လိမ်လည်ခံရတာ မကြာခဏ ဖြစ်ပွားနေတာကြောင့် အလွယ်မယုံကြဖို့ လူမှုကူညီရေးအသင်းတွေက တိုက်တွန်းထားကြပါတယ်။
ဒါ့အပြင် တရုတ်နိုင်ငံမှာ အလုပ်ရမယ်ဆိုပြီး ပွဲစားကနေတစ်ဆင့် တရုတ်မယားအဖြစ် ရောင်းစားခံရတာ၊ လိင်လုပ်သားအဖြစ် ရောင်းစားခံရတာနှင့် အတင်းအဓမ္မ စေခိုင်းခံရတာတွေကို မြန်မာအမျိုးသမီးတွေ မကြာခဏ ကြုံတွေ့နေကြရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
