ယာရူစိင်၊ မေလ ၂၉ ရက်၊ လားရှိုး
စစ်ကောင်စီတပ် ပြန်လည်အုပ်ချုပ်နေတဲ့ ရှမ်းမြောက် လားရှိုးမြို့ထဲ ဈေးကနေ ပြန်လာတဲ့ အမျိုးသမီးတစ်ဦး လုယက်ခံရပြီး ဆွဲကြိုး၊ လက်စွပ်နှစ်ကွင်းနဲ့ ဖုန်းတွေ ပါသွားတယ်လို့ ကာယကံရှင်ဖြစ်သူက ရွှေဖီမြေကို ပြောပါတယ်။
ဒီနေ့ မေလ ၂၉ ရက် မနက်အစောပိုင်းမှာ လားရှိုးမြို့ ရပ်ကွက်(၅) အောင်မင်္ဂလာဈေးကနေ ပြန်လာတဲ့ အမျိုးသမီးတစ်ဦးကို ဝတ်စုံအနက်ရောင် ဝတ်ထားတဲ့ အမျိုးသား ၂ ဦးက ရှေ့ကနေ ပိတ်ရပ်ပြီး ဆွဲကြိုး၊ လက်စွပ်နှစ်ကွင်းနဲ့ဖုန်းကို လုယက်ယူဆောင်သွားခဲ့တာပဲ ဖြစ်ပါတယ်။
“နှစ်ယောက်စလုံးက အနက်ရောင်ဝတ်စုံ ဝတ်ထားတယ်။ တစ်ယောက်ကတော့ သေနတ်အတို ခါးမှာ ညှပ်ထားတယ်။ နောက်တစ်ယောက်တော့ သေနတ် မပါဘူး ဓားတစ်လက် ပါတယ်။ ကျမ ဆွဲထားတဲ့ ဆွဲကြိုး ဖြုတ်ပေးလိုက်ရတယ်။ လက်စွပ်နဲ့ ဖုန်းလည်း ပါသွားတယ်။ ပိုက်ဆံတော့ ၅ သောင်းလောက်ပဲ ပါသွားတယ်” လို့ ကာယကံရှင် အမျိုးသမီးက ပြောပါတယ်။
မနေ့ မေလ ၂၈ ရက် မနက်အစောပိုင်းကလည်း လားရှိုးမြို့ ရပ်ကွက် ၁၂ ရှိ အဝေယျာလမ်းသွယ်မှာ ဆိုင်ကယ် စီးလာတဲ့ အမျိုးသားတစ်ဦးရဲ့ ဆိုင်ကယ်ကို ရဲဝတ်စုံ ဝတ်ဆင်ထားတဲ့ အမျိုးသားက ဆိုင်ကယ် လုယက်သွားခဲ့ပါတယ်။
လက်ရှိအချိန်ထိ လားရှိုးမြို့ပေါ်ရှိ ပြည်သူ့ဆေးရုံကြီးအပါအဝင် တချို့ယန္တရားကို စစ်ကောင်စီက စတင်လုပ်ဆောင်နေပေမဲ့ လုံခြုံရေးအပိုင်းကိုတော့ လက်ရှိအချိန်ထိ မလုပ်ဆောင်နိုင်သေးကြောင်း ဒေသခံတွေရဲ့ ပြောပြချက်အရ သိရပါတယ်။
လားရှိုးမြို့ကို စစ်ကောင်စီတပ် ဝင်ရောက်ပြီးနောက် ပြီးခဲ့တဲ့ ဧပြီ ၂၂ ရက်ကနေ ဒီနေ့ မေလ ၂၉ ရက်အထိ ဓားပြတိုက်မှုနဲ့ လုယက်မှု ၁၆ ကြိမ်ထက်မနည်း ဖြစ်ပွားခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
