လွေးဇွန်မိုး၊ မေလ ၂၉ ရက်၊ လားရှိုး
ရှမ်းမြောက် လားရှိုးမှာ နိုင်ငံသားစီစစ်ရေးကတ်ပြား(မှတ်ပုံတင်) လုပ်ဖို့ တုံကင်ယူရာမှာ နေရာရောင်းစားတာတွေရှိနေတယ်လို့ ဒေသခံတွေဆီက စုံစမ်းသိရပါတယ်။
စစ်ကောင်စီတပ် လားရှိုးကို ပြန်လည်ဝင်ရောက်လာပြီးနောက် လားရှိုးရှိ လူဝင်မှုကြီးကြပ်ရေးဌာန (လဝက)ရုံးကို ပြီးခဲ့တဲ့ မေလ ၁၉ ရက်မှာ စဖွင့်ခဲ့တာဖြစ်ပြီး လက်ရှိမှာတော့ မှတ်ပုံတင်ကို တုံကင်စနစ်နဲ့ ပြုလုပ်ပေးနေတာဖြစ်တယ်လို့ ဆိုပါတယ်။
သုံးရက်ကို လူအယောက်၂၀၀ တုံကင်ပေးပြီး တုံကင်ယူရာမှာ တံခါးစောင့်တဲ့ ဝန်ထမ်းနဲ့ ဆိုင်ကယ်စောင့်တဲ့ ဝန်ထမ်းတွေက နေရာရောင်းစားနေတာတွေရှိနေတယ်လို့ ဒေသခံ အမျိုးသမီးတစ်ဦးက ပြောပါတယ်။
“မှတ်ပုံတင်လုပ်တာက မကြာဘူး။ လုပ်ရဖို့အရေး တုံကင်ယူရတာကြာတာ။ တံခါးစောင့်ဝန်ထမ်းနဲ့ ဆိုင်ကယ်စောင့်တဲ့လူတွေက နေရာရောင်းစားနေတာ။ ည ၁၂ နာရီ ကတည်းက သွားတန်းစီတဲ့လူတွေပြောတာတော့ သူတို့ရောက်တော့ အရှေ့မှာလူတစ်ယောက်မှမရှိဘူးတဲ့။ အဲ့တာနဲ့ ပထမဆုံးနေရာမှာ သွားတန်းစီတော့ တံခါးစောင့်ဘိုးတော်က ဒီနားမှာလူရှိတယ်ဆိုပြီး လူတစ်ရာစာလောက်ဝေးတဲ့နေရာမှာ တန်းစီခိုင်းတာ။ တံခါးစောင့်ဘိုးတော်ကမနက် ၈ နာရီလောက်မှလာတဲ့လူတွေကို တစ်ခုံ ၃၀၀၀၀ အနောက်ဘက်ဆို ၁၅၀၀၀ နဲ့ ပြန်ရောင်းစားတာ။ ပိုက်ဆံတတ်နိုင်တဲ့လူတွေအတွက်တော့ အဆင်ပြေတာပေါ့။ မှတ်ပုံတင် လုပ်ပေးတဲ့ ဝန်ထမ်းတွေက အခုကိစ္စကို မသိလောက်ဘူးထင်တယ်။လုပ်စားနေတဲ့လူတွေကြောင့် စောစောလာတန်းစီးတဲ့လူတွေက တုံကင်မရကြဘူး”
ဒါ့အပြင် မှတ်ပုံတင်လုပ်ရာမှာလည်း လဝကရုံး ဝန်ထမ်းနဲ့ ပွဲစားတွေပေါင်းပြီး တုံကင်ယူဖို့ တန်းစီစောင့်ဆိုင်းတဲ့ သူတွေထက် ငွေကြေးတတ်နိုင်တဲ့ တရုတ်လူမျိုးတွေကိုသာ ဦးစားပေးလုပ်ပေးနေတယ်လို့ ဒေသခံအမျိုးသား တစ်ဦးက ရွှေဖီမြေကို ပြောပါတယ်။
“မှတ်ပုံတင်တွေ လုပ်တော့လုပ်ပေးပြီး မနက် ၆ နာရီကစပြီး လဝကရုံးမှာ လူရာချီတန်းစီပြီး စောင့်နေတာ ဒါပေမဲ့ စကစအကျင့်စရိုက်ဟောင်းတွေ သိတဲ့အတိုင်းပဲ ပိုက်ဆံတတ်နိုင်တဲ့လူတွေနဲ့ တရုတ်လူမျိုးတွေကို သူတို့အရင်လုပ်ပေးတယ်။ နေပူထဲတန်းစီပြီး စောင့်နေတဲ့လူတွေကိုတော့ သူတို့မလုပ်ပေးဘူး တရုတ်တွေဆို ဆယ်ချီရာချီပေးနိုင်တယ်လေ။ တရုတ်တွေကိုပဲ သူတို့ဦးစားပေးလုပ်ပေးတယ်”လို့ ဆိုပါတယ်။
စစ်ကောင်စီတပ်က တရုတ်အကူညီနဲ့ လားရှိုးမြို့ကို ပြီးခဲ့တဲ့ ဧပြီလ ၂၂ ရက်မှာ ပြန်လည်ဝင်ရောက်ထိန်းချုပ်ခဲ့တာဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
