မိုင်းရူပ၊ ဧပြီ ၂၄ ရက်၊ လားရှိုး
တရုတ်အစိုးရရဲ့ ကြားဝင်စေ့စပ်မှုကြောင့် စစ်ကောင်စီတပ် ပြန်လည် အုပ်ချုပ်မယ့် ရှမ်းမြောက် လားရှိုးမြို့မှာ လာမယ့် မေလထဲ အုပ်ချုပ်ရေးလုပ်ငန်း စတင်လည်ပတ်မှာဖြစ်တယ်လို့ လားရှိုးဒေသခံတွေက ရွှေဖီမြေကို ပြောပါတယ်။
စစ်ကောင်စီနဲ့ MNDAA တို့ အပစ်ရပ်ဖို့ သဘောတူခဲ့ပြီးနောက် ကိုးကန့်တပ်ဟာ လားရှိုးမြို့ကနေ ထွက်ခွာရမှာဖြစ်ပြီး စစ်ကောင်စီရဲ့ အုပ်ချုပ်ရေးယန္တရား ဝင်ရောက် လည်ပတ်မှာ ဖြစ်ပါတယ်။
လားရှိုးမြို့တွင်းသို့ ဝင်ရောက်လာတဲ့ စစ်ကောင်စီတပ်ဖွဲ့ဝင်တချို့ဟာ လားရှိုးမြို့ ရပ်ကွက်(၁၂)အကျော်ဘက်က အေတီတံတားမှာ စောင့်နေပြီး ဖြတ်သန်သွားလာသူတွေကို ငွေတောင်းတာ ရှိနေပြီး လားရှိုး-သီပေါလမ်း လားရှိုးမြို့အထွက်မှာလည်း ဘန်ကာတွေ တည်ဆောက်နေတယ်လို့ ဆိုပါတယ်။
“လကုန်ရင်တော့ အကုန်ပြန်လည်ပတ်မယ်တဲ့။ အေတီတံတားထိပ်မှာ ကားတွေကို မနေ့ကတည်းက ပိုက်ဆံ စကောက်နေပြီ။ ဝင်လာသမျှကားတွေ စစ်ပြီး ကောက်နေတာ။ တစ်စီး တစ်သောင်းခွဲ တောင်းတာ” လို့ လားရှိုးမြို့ရှိ စစ်ရေးသတင်းအရင်းအမြစ်တစ်ဦးက ရွှေဖီမြေကို ပြောပါတယ်။
လားရှိုးမြို့ထဲ ကိုးကန့်တပ် ဆုတ်ခွာသွားပြီးနောက် ပြီးခဲ့တဲ့ ဧပြီ ၂၂ ရက်မှာ စစ်ကောင်စီ ယာဉ်တန်းဟာ လားရှိုးမြို့တွင်းထဲ ဝင်ရောက်လာပြီး မြို့အဝင်မှာရှိတဲ့ ခြေလျင်တပ်ရင်း ၄၁ တပ်နဲ့ ထောက်ပို့တပ် ၆၂၆ မှာ တပ်စွဲထားတယ်လို့ ဒေသခံတွေက ပြောပါတယ်။
လားရှိုးကို စစ်ကောင်စီထံ ငြိမ်းချမ်းစွာ လွှဲပြောင်းပေးဖို့ တရုတ်အစိုးရရဲ့ အပစ်ရပ် စောင့်ကြည့်ရေးအဖွဲ့ကို လားရှိုးမြို့သို့ တရုတ်ဘက်က ပို့ဆောင်ထားပါတယ်။
စစ်ကောင်စီရဲ့ အရှေ့မြောက်တိုင်းစစ်ဌာနချုပ် အခြေစိုက်ရာ လားရှိုးမြို့ကို MNDAA နဲ့ နွေဦးတော်လှန်ရေးတပ်တွေက ပူးပေါင်းပြီး ပြီးခဲ့တဲ့ ၂၀၂၄ ခုနှစ် သြဂုတ် ၃ ရက်မှာ တိုက်ခိုက်သိမ်းပိုက်ခဲ့ပြီးတော့ ၈ လကျော်အကြာမှာ စစ်ကောင်စီထံ ပြန်လည် လွှဲပြောင်းပေးခဲ့ရတာပဲ ဖြစ်ပါတယ်။
