ရွှေဖီမြေ၊ မတ်လ ၂၉ ရက်၊ နောင်ချို
မနေ့ မတ်လ ၂၈ ရက် နေ့လယ်က ငလျင် လှုတ်ခတ်နေချိန်အတွင်း နောင်ချိုမြို့နယ် နောင်လင်ရွာထဲ စစ်တပ်က ဂျက်ဖိုက်တာ ၃ စီးနဲ့ ဗုံးကြဲတိုက်ခိုက်ခဲ့လို့ ဓနုတပ်- DPLA ရဲ့ စစ်မေ ၆ ဦးနဲ့ တပ်သား ၁ ဦး စုစုပေါင်း ၇ ဦး ကျဆုံးခဲ့ပြီး အရပ်သား ထိခိုက်မှုလည်း ရှိခဲ့တယ်လို့ ရွှေဖီမြေက စုံစမ်းသိရှိရပါတယ်။
“ကျနော်တို့တပ်တွေ ရှိတဲ့နေရာ ၁၂ နာရီ ၅၂ မိနစ်မှာ ငလျင် လှုပ်နေတာ။ အဲချိန်မှာဘဲ ဆက်သွယ်ရေးက လေကြောင်း သတင်းပေးလာတယ်။ မကြာဘူး ၁၂ နာရီ ၅၄ မိနစ်မှာ ချက်ချင်း ရောက်လာပြီးတော့ ကြဲသွားတာ။ ၃ စီး ကြဲတာ။ အဲဒါတင် မကဘူး။ စက်သေနတ်တွေနဲ့ကော ပစ်သွားတာ” လို့ DPLA တပ်ဖွဲ့ကို ဦးဆောင်နေသူ ဦးထွန်းထွန်းနိုင်က ရွှေဖီမြေကို ပြောပါတယ်။
လေကြောင်း သတင်းရချိန် စစ်မေ ၆ ဦးဟာ ဗုံးခိုကျင်းထဲ ဝင်ရောက် ပုန်းခိုခဲ့ပေမဲ့ အဲဒီဗုံးသီးဟာ ကျင်းထဲ တည့်တည့် ကျရောက်ခဲ့တာကြောင့် ၆ ဦးစလုံး သေဆုံးသွားတာလို့ ဆိုပါတယ်။
“ဗုံးအကြီးကတော့ ၈ လုံး ချသွားတယ်။ ရွာသားတွေ ထိတာလည်း ရှိတယ်။ ဒဏ်ရာတော့ မပြင်းထန်ဘူး။ စာသင်ကျောင်း ၁ ကျောင်းနဲ့ အိမ်ကတော့ ၄ လုံး ထိခိုက်ပျက်စီးသွားတယ်” လို့ ဦးထွန်းထွန်းနိုင်က ဆက်ပြောပါတယ်။
နောင်လင်ရွာဟာ တိုက်ပွဲ ပြင်းထန်နေတဲ့ တောင်းခမ်းနဲ့ အလှမ်းဝေးပြီး စစ်တပ်ရဲ့ သတင်းပေးကြောင့် ဗုံးကြဲခံရတာဖြစ်ပြီး သတင်းပေးသူကိုလည်း အရေးယူဖို့ လုပ်ဆောင်နေတယ်လို့ ဆိုပါတယ်။
ငလျင် လှုပ်ပြီးချိန်မှာလည်း စစ်တပ်ဟာ ကရင်၊ ပဲခူးနဲ့ စစ်ကိုင်းတိုင်းဘက်မှာ လေကြောင်း တိုက်ခိုက်မှု ဆက်တိုက်ပြုလုပ်နေတယ်လို့ ဒေသတွင်း သတင်းတွေက ရေးသားဖော်ပြနေကြပါတယ်။
