သူတော်စိန်၊ မတ်လ ၆ ရက်၊ မူဆယ်
ရှမ်းမြောက် တရုတ်-မြန်မာ နယ်စပ်ဖြစ်တဲ့ မူဆယ်မြို့မှာ တရုတ်နယ်စပ်ဖြတ်သန်းခွင့် BPစာအုပ်အနီလုပ်ဖို့အတွက် တုံကင်ယူစဉ် ငွေ ၇သိန်းကျော်ကနေ ၉ သိန်းကျပ်အထိ ခရိုင်လဝကမှူးဆီ လာဘ်ပေးဆောင်နေရတယ်လို့ ဖြစ်စဉ်သိရှိသူတစ်ဦးက ရွှေဖီမြေကို ပြောပါတယ်။
တုံကင်ရမဲ့ရက်ကို မူဆယ်မြို့မှာရှိတဲ့ ခရိုင်လဝကရုံးက ကြေညာတင်ထားပေမယ့် မူဆယ်မြို့နဲ့ နမ့်ခမ်းမြို့ အိမ်ထောင်စုရှိတဲ့သူတွေအတွက်သာ BPစာအုပ်နီအတွက် တုံကင်ရယူတာဖြစ်ပြီး အလှည့်ကျစနစ်နဲ့ တုံကင်ပေးတာဖြစ်တဲ့အတွက်ကြောင့် တုံကင်ရောင်းစားနေတာတွေလည်း ရှိနေတာဖြစ်တယ်လို့ ဆိုပါတယ်။
“၂၈ ရက်နေ့ရမယ်ဆိုလို့ တုံကင်အမြန်ကြေးပေးလုပ်ထားတာ။ သူတို့ကို ၈ သိန်းခွဲပေးရတယ်။ ပွဲစားကနေ ချိတ်ဆက်တာဆိုတော့ ပွဲစားကို ချိတ်ဆက်ခ ၅သောင်း ထပ်ပေးရတယ်။ ပွဲစားကပဲ လိုက်ပို့တာ”လို့ ပြောပါတယ်။
မူဆယ်နဲ့ နမ့်ခမ်းမြို့ အိမ်ထောင်စု မဟုတ်တဲ့ တခြားမြို့တွေကို BPစာအုပ်အနီလုပ်ဖို့အတွက်ဆိုပြီး အရေးပေါ် အကြောင်းပြချက်နဲ့ ခရိုင်လဝကမှူးက ရုံးချုပ်ကို စာတင်ပြီး ရုံးစာမကျလာတာကြောင့် ငွေ သိန်း ၁၀၀ နဲ့ တရားမဝင်ဆောင်ရွက်ပေးနေတာတွေ ရှိတယ်လို့ နောက်ထပ်အမျိုးသားတစ်ဦးက ပြောပါတယ်။
“အဲဒီမူဆယ်နဲ့ နမ့်ခမ်းအိမ်ထောင်စုတွေနဲ့ လုပ်ပေးနေတာပေါ့။ သူတို့ရဲ့ မှတ်ပုံတင်နံပါတ်ကို BPစာအုပ်အနီပေါ်က ဓာတ်ပုံနေရာမှာ တခြားပြည်နယ်နဲ့ တခြားမြို့ရဲ့ သူတို့ဓာတ်ပုံတွေ ကပ်ပြီး လုပ်ပေးနေတာ”လို့ ဆိုပါတယ်။
တုံကင်အမြန်ရဖို့အတွက် မူဆယ်မြို့မှာရှိတဲ့ မကြိုင်၊ ညီခ၊ ထွန်းလူ၊ ကျော်သောင်း နဲ့ နန်းဟွမ်တို့ ပွဲစားတွေဟာ ဒုခရိုင်လဝကမှူးဖြစ်တဲ့ မနှင်းယုနိုင်ဆိုတဲ့ ဝန်ထမ်းတစ်ဦးနဲ့ ချိတ်ဆက်ပေးတွေ့ပြီး တုံကင်အမြန်ရအောင် ဆောင်ရွက်ပေးနေတာဖြစ်တယ်လို့ အဆိုပါ အမျိုးသားက ပြောပါတယ်။
မူဆယ်မြို့မှာ နယ်စပ်ဖြတ်သန်းဖို့အတွက် တုံကင်လုပ်တဲ့ လူထုတွေကို နေရာရောင်းစားတာရှိသလို တုံကင်ရောင်းစားတဲ့သူတွေလည်း ရှိနေတာဖြစ်ပါတယ်။
