ခိုင်လေး၊ မတ်လ ၂ ရက်၊ လားရှိုး
ကိုးကန့်တပ်- MNDAA ထိန်းချုပ်ဒေသဖြစ်တဲ့ လားရှိုးမြို့မှာ အသက်အရွယ်မရွေး မျက်စိအတွင်းတိမ်ရောဂါ အခမဲ့ ခွဲစိတ်ကုသမှုကို မနေ့ မတ်လ ၁ ရက်ကစပြီး လာမယ့် မတ်လ ၇ ရက်အထိ ကုသပေးသွားမှာ ဖြစ်ပါတယ်။
လားရှိုးမြို့ပေါ်က ရပ်ကွက်အလိုက် စာရင်းကောက်ယူထားတဲ့ လူဦးရေ ၂၀၀ ကျော်အထိ ရှိလာတာဖြစ်ပြီး အဲဒီအထဲမှာမှ သေချာစမ်းသပ် စစ်ဆေးပြီးမှ ခွဲစိတ်မှု ပြုလုပ်သွားမှာ ဖြစ်တယ်လို့ လားရှိုးပြန်လည်ထူထောင်ရေးမှ တာဝန်ရှိသူတစ်ဦးက ရွှေဖီမြေကို ပြောပါတယ်။
“အဓိကတော့ အတွင်းတိမ်တစ်ခုတည်းကို ဘဲ ကုသပေးဖို့ ရှိတယ်လို့ ကြားတယ်။ လူဦးရေတော့ ကန့်သတ်တာ မရှိဘူး။ လားရှိုးမြို့ပေါ်ရှိတဲ့ ဒေသခံတွေကို အခမဲ့ ကုသပေးတယ်။ အခြားဒေသက လူတွေကိုကြတော့ ခွဲစိတ်ကုသပေးတာတွေတော့ ရှိတယ်။ အခမဲ့ ခွဲစိတ်ပေးတာတော့ မရှိသေးဘူး”
လက်ရှိ ရရှိထားတဲ့ စာရင်းအရ လူဦးရေ ၂၀၀ ကျော်ကို ၃ ရက်နေ့အထိ စမ်းသပ်စစ်ဆေးပေးသွားမှာဖြစ်ပြီး တစ်ရက်ကို လူဦးရေ ၇၀ အထိ စစ်ဆေးသွားမှာ ဖြစ်တယ်လို့ ဆိုပါတယ်။
စစ်ဆေးပြီးနောက် ၄ ရက်နေ့မှာ ခွဲစိတ်ကုသရမယ့်သူရဲ့စာရင်းကို ထုတ်ပြန်ပေးသွားမှာဖြစ်ပြီး မတ်လ ၅ ရက်ကနေ ၇ ရက်နေ့မှာ ခွဲစိတ်ကုသပေးသွားမှာ ဖြစ်တယ်လို့ သူကဆက်ပြောပါတယ်။
မျက်စိအတွင်းတိမ်နဲ့ ပတ်သက်ပြီး ခွဲစိတ်ကုသပေးတာဟာ ပထမဆုံးအကြိမ်ဖြစ်ပြီး နောက်နောင်လည်း ဆက်လုပ်ပေးသွားဖို့ ရှိတယ်လို့ ဆိုပါတယ်။
လားရှိုးမြို့ကို ပြီးခဲ့တဲ့ ၂၀၂၄ ဩဂုတ် ၃ ရက်မှာ MNDAA နဲ့ ပူးပေါင်းတပ်တွေက တိုက်ခိုက်သိမ်းပိုက်ပြီး MNDAA က စီမံအုပ်ချုပ်နေတာ ဖြစ်ပါတယ်။
