မိုင်းရူပ၊ ဖေဖော်ဝါရီ ၁၈ ရက်၊ နောင်ချို
တရုတ်နိုင်ငံရဲ့ ကြားဝင်စေ့စပ်မှုနဲ့ စစ်ရေးအရှိန် လျှော့ချဖို့ တွေ့ဆုံဆွေးနွေးခဲ့ပေမဲ့ စစ်ကောင်စီတပ်က ထိုးစစ်ဆင် တိုက်ခိုက်နေတာကြောင့် ရှမ်းမြောက် နောင်ချိုမြို့နယ်ထဲ စစ်တပ်နဲ့ တအာင်းတပ်မတော်- TNLA တို့ တိုက်ပွဲ ဆက်လက် ပြင်းထန်နေတယ်လို့ ရွှေဖီမြေက စုံစမ်းသိရှိရပါတယ်။
စစ်တပ်က ထိုးစစ်ဆင် တိုက်ခိုက်နေတာကြောင့် ဒီနေ့ ဖေဖော်ဝါရီ ၁၈ ရက် မနက်ကနေစပြီး နောင်ချိုမြို့နယ် နားရှိုးရွာထဲ တိုက်ပွဲ ပြင်းထန်နေတယ်လို့ ရှေ့တန်းစစ်မြေပြင်မှာ ရှိနေသူတစ်ဦးက ရွှေဖီမြေကို ပြောပါတယ်။
“တိုက်ပွဲက မနက်ကတည်း ဖြစ်နေတာ။ နားရှိုးရွာထဲမှာ ဖြစ်နေတာ။ စစ်ကောင်စီတွေ ထိုးလာလို့ ဖြစ်တာ။ မနက်မှာ လေယာဥ်နဲ့ ဗုံး ၃ လုံး လာကြဲသွားတယ်”
နားရှိုး တိုက်ပွဲမှာ စစ်တပ်က ထိုးစစ်ဆင်တိုက်ခိုက်လာတာကြောင့် အကျအဆုံး များပြီး အရေအတွက် အတိအကျကိုတော့ မသိရသေးဘူးလို့ သူက ဆက်ပြောပါတယ်။
မနေ့ ဖေဖော်ဝါရီ ၁၇ ရက် ည ၈ နာရီခွဲမှာလည်း TNLA ထိန်းချုပ်ထားတဲ့ ရှမ်းမြောက် နမ္မတူ-ကွတ်ခိုင်အစပ်ရှိ မန်ဆာရွာအနီးတစ်ဝိုက် စစ်တပ်က ဗုံးကြဲတိုက်ခိုက်ခဲ့ပါတယ်။
ပြီးခဲ့တဲ့ ဖေဖော်ဝါရီ ၁၆ ရက်ကစပြီး တရုတ်ရဲ့ ကြားဝင်စေ့စပ်မှုကြောင့် စစ်တပ်နဲ့ TNLA အကြား တရုတ်နိုင်ငံ ကူမင်းမြို့မှာ ဆွေးနွေးပွဲ ပြုလုပ်ခဲ့ရာ ဆွေးနွေးမှု ရလဒ်ကိုတော့ မသိရသေးပါဘူး။
စစ်တပ်နဲ့ TNLA ကတော့ တွေ့ဆုံဆွေးနွေးပွဲရလဒ်နဲ့ ပတ်သက်ပြီး တစ်စုံတရာ ထုတ်ပြန်ပြောဆိုထားတာ မရှိသေးပါဘူး။
