ပို့လဘား၊ ဖေဖော်ဝါရီ ၁၆ ရက်၊ ကျောက်မဲ
ရှမ်းမြောက် ကျောက်မဲမြို့တွင်းမှာ ဆိုင်ကယ် ပါဝါအိတ်ဇော တပ်လို့ဆိုပြီး တအာင်းတပ်မတော်- PSLF/TNLA ရဲ့ ရဲတပ်ဖွဲ့က ဒဏ်ငွေ ၁ သိန်းခွဲ ဆောင်ခိုင်းခဲ့တယ်လို့ ဖြစ်စဉ်သိရှိသူ အမျိုးသားတစ်ဦးက ပြောပါတယ်။
ပြီးခဲ့တဲ့ ဖေဖော်ဝါရီ ပထမအပတ်က ကျောက်မဲမြို့မှာ ဆိုင်ကယ်ပါဝါအိတ်ဇော တပ်ပြီး မောင်းလာတဲ့ ဒေသခံ ၂ ဦးကို ရဲတပ်ဖွဲ့က ဖမ်းပြီး ဒဏ်ငွေ ၁ သိန်းခွဲ ဆောင်ခိုင်းတာလို့ ၎င်းက ပြောပါတယ်။
“ဆိုင်ကယ်အိတ်ဇောက ပေါက်နေတာ အဲဒါကို သူတို့က တားပြီး ဆူဆဲတယ်။ ကျောက်မဲမြို့ ခရိုင်ရဲရုံးထဲ ခေါ်စစ်တာ။ ပြီးတော့ သံချောင်းနဲ့ ၉ ချက် ရိုက်တယ်။ ပါးတစ်ချက် ရိုက်တယ်။ နောက်ကျ ဒဏ်ကြေးဆိုပြီး တစ်သိန်းခွဲ တောင်းတာ တစ်သိန်းရှိလို့ ပေးခဲ့လိုက်တာ။ အမျိုးသမီးကတော့ ရဲမေ ဟုတ်မဟုတ်တော့ မသိဘူး အရပ်ဝတ်စုံနဲ့။ အဲဒီယောကျာ်းလေးကတော့ ရဲဝတ်စုံနဲ့။ အဲဒီမိန်းမက သူ့ကို လက်ထိပ် ပစ်ပေးပြီး လက်ထိပ်တောင် ခတ်ခိုင်းတာ”
ကျောက်မဲမြို့မှာ ယာဉ်စည်းကမ်း လမ်းစည်းကမ်းနဲ့ပတ်သက်ပြီး ထုတ်ပြန်ထားတာ မရှိသေးဘဲ ဆူညံအိတ်ဇော တပ်ရင် အိတ်ဇော လဲခိုင်းတာနဲ့ ဆိုင်ကယ်တစ်စီးကို ၂ ဦးအထက် စီးရင် ထိုင်ထ လုပ်ခိုင်းတာရှိပြီး ဒဏ်ကြေး ဆောင်ခိုင်းတာ မရှိသေးဘူးလို့ ကျောက်မဲမြို့မှ တအာင်းတပ်ရဲ့ တာဝန်ရှိသူတစ်ဦးက ပြောပါတယ်။
“ကျောက်မဲမှာတော့ အဲလိုထုတ်ပြန်ထားတာ မရှိသေးပါဘူး။ သုံးယောက်စီးရင် ထိုင်ထ လုပ်ခိုင်းတာတွေပဲ ရှိတယ်။ နောက်ထပ် မလုပ်အောင်ဘဲ လုပ်ခိုင်းတာ။ ပြီးရင် တစ်ယောက် အရင်ပို့ခိုင်းပြီး နောက်တစ်ယောက် လာကြိုခိုင်းတာ”
ဆက်လက်ပြီး ၎င်းတာဝန်ရှိသူက “ဆိုင်ကယ်ပါဝါအိတ်ဇော တပ်တဲ့သူတွေကို ပိုက်ဆံ ကောက်တာလည်း မရှိပါဘူး။ ကောက်တဲ့သူ ရှိရင်လည်း ကျနော်တို့ အရေးယူမယ်။ ပါဝါအိတ်ဇောဆိုရင် ထိုင်ထ လုပ်ခိုင်းတာလည်း မရှိဘူး။ သူတို့ကို ရိုးရိုးအိတ်ဇော သွားဝယ်ခိုင်းတယ်။ ပြီးမှ သူတို့ဆိုင်ကယ် ပြန်ပေးပြီး အဲဒီပါဝါအိတ်ဇောတွေကိုတော့ ရဲစခန်းမှာဘဲ သိမ်းထားတာ” ဆိုပြီး ရှင်းပြပါတယ်။
ကျောက်မဲမြို့ကို ၁၀၂၇ စစ်ဆင်ရေး ဒုတိယလှိုင်းအတွင်း ၂၀၂၄ ဩဂုတ် ၅ ရက်မှာ တအာင်းတပ်က တိုက်ခိုက်သိမ်းပိုက်ပြီးတော့ လက်ရှိမှာ အုပ်ချုပ်ရေးယန္တရား လည်ပတ်နေတဲ့မြို့ ဖြစ်ပါတယ်။
ကျောက်မဲမြို့အပြင် တအာင်းတပ် ထိန်းချုပ်တဲ့ နမ္မတူ၊ နမ့်ဆန်၊ မန်တုံ၊ ကွတ်ခိုင်၊ နမ့်ခမ်းမြို့မှာလည်း တအာင်းတပ်ဖွဲ့ဝင်တွေကိုယ်တိုင် ယာဉ်စည်းကမ်း လမ်းစည်းကမ်း မလိုက်နာကြဘဲ ဆိုင်ကယ်တစ်စီး ၃ ဦး စီးတာနဲ့ ကား မောင်းရာမှာ အရှိန်ပြင်းစွာ မောင်းနှင်နေကြတဲ့အပေါ် မြို့ခံလူထုတွေက ဝေဖန်ပြောဆိုမှု ရှိနေပါတယ်။
