ပျားကြီး၊ ဖေဖော်ဝါရီ ၁၅ ရက်၊ စစ်ကိုင်း
စစ်ကိုင်းမြို့ပေါ်မှာ ဒီနေ့ ဖေဖော်ဝါရီ ၁၅ ရက် မနက်အစောပိုင်းက လူငယ် ၂၀ ကျော်ကို စစ်မှုထမ်းဖို့အတွက် စစ်ကောင်စီတပ်က အဓမ္မ ဖမ်းဆီးခဲ့တယ်လို့ မျက်မြင်တွေ့သူ ဒေသခံတွေက ပြောပါတယ်။
စစ်ကိုင်းချောင် ရှင်ဖြူရှင်လှဘုရားရှေ့မှာ ဒီနေ့မနက် အစောပိုင်းက လမ်းပေါ်မှာ သွားလာနေသူထဲက အသက် ၃၀ အောက် လူငယ်ကို စစ်ဆေးပြီး ဖမ်းဆီးခဲ့တာ ဖြစ်ပါတယ်။
“ဆိုင်ကယ်နဲ့ အလုပ်သွားဖို့ လာတဲ့ကလေးတွေ ပါတယ်။ လမ်းလျှောက်လာတဲ့ လူတွေလည်း ပါတယ် အစုံပဲ။ အကုန်လုံး ကားပေါ် တန်းတင်ပြီး ခေါ်သွားတာ။ ဆိုင်ကယ်တွေပါယူသွားတယ်” လို့ ဒေသခံတစ်ဦးက ပြောပါတယ်။
ဖမ်းဆီးခံရသူတွေဟာ အနီးအနားရပ်ကွက်နဲ့ မင်းကွန်းဒေသဘက်က ကျေးရွာမှာ နေထိုင်သူ ဖြစ်တယ်လို့ ဒေသခံတွေက အတည်ပြု ပြောဆိုပါတယ်။
စစ်အင်အား ပြုန်းတီးမှုနဲ့ ရင်ဆိုင်နေရတဲ့ စစ်တပ်ဟာ စစ်ကိုင်းမြို့ပေါ် ရပ်ကွက်နဲ့ ရတနာပုံတံတားအပါအဝင် မြို့အဝင်အထွက် ဂိတ်ကနေ ဒီနှစ်ဆန်းပိုင်းကစပြီး စစ်မှုထမ်းဖို့ အတင်းအကြပ် ဖမ်းဆီးခေါ်ဆောင်လေ့ ရှိတယ်လို့ ဒေသခံတွေက ပြောဆိုပါတယ်။
ပြီးခဲ့တဲ့ ဇန်နဝါရီလအထိ ဖမ်းဆီးခံရသူကို အနည်းဆုံး ကျပ်သိန်း ၈၀ ကနေ သိန်း ၁၀၀ အထိ ငွေညှစ်တောင်းယူပြီး ပြန်လွှတ်ပေးလေ့ရှိပေမဲ့ ဒီဖေဖော်ဝါရီ လဆန်းပိုင်းကစပြီး ပြန်လွှတ်ပေးတာ မရှိတော့ဘူးလို့ မန္တလေးမြို့ဘကို နေ့စဥ် အလုပ် လာရောက်လုပ်ကိုင်လေ့ ရှိသူတစ်ဦးက ပြောပါတယ်။
ဇန်နဝါရီ လဆန်းပိုင်းကစပြီး လက်ရှိအချိန်ထိ စစ်ကိုင်းမြို့နယ်ထဲ စစ်မှုထမ်းဖို့ ဖမ်းဆီးခံခဲ့ရသူ စုစုပေါင်း ၂၀၀ ကျော်ရှိပြီး အဆက်အသွယ်မရဘဲ ပျောက်ဆုံးနေသူလည်း ၂၀ ကျော် ရှိနေသေးတယ်လို့ စစ်ရှောင် ကူညီပေးနေသူ စစ်ကိုင်းမြို့ခံတစ်ဦးက ပြောဆိုပါတယ်။
