ဆုမူန်၊ ကျံရ်ဇူန် ဆငည်း 14၊ အေဲမ်ကိုက်
ကောန်အီပ်ုန် ကဝ်အီအာဝ်ပ္လိူရ်ႈဇီုဝ်နီန်အူအီး က္လာင်းတဆျှိုည်ဖီမျေဒါႈ ခူန်တံပ်ဆီုက်ခါင် – KIA ကဲအူအီး ပဴင်ယံမ်းဟာဝ်း ကောန်ဆီုက် ပရဝ်ကော်င်းခါး လှံင်အေဲမ်ကိုက် ကပီုန်ဆျှံမ်ကဒါႇပိူည်နီန်အူအီးအောႏ။
အ်ုန်ဒါႈ အ်ုန်ပဲန်ဟာဝ်း ခည်ကျံရ်ဇူန် ဆငည်း 10 ခိင်မှိူဝ်ကပံတ် 9နြီဒိူန် ဉီးလရှီးနော်လီ အ်ုန်အီမိုႈခူန် တီုင်တံပ်ဒါင်း (10) KIA ကဲ အီရည်းပအရာပ်ရဝ်ကော်င်ခါးကဲနီန် အ်ုန်ဒါႈဉီးဆန်းအောင် ဘိူန်းအဆာက် 31ဆန်ုမ် ကဝ်အီမိုႈရနားအ်ုန်ဒီန် ညွံတ်ဖိင် စီပဴင်ယံမ်းဟာဝ်းအောႏ။
အ်ုန်ဒါႈ “မိူဝ်ႈအေ့ ဘည်ဒါအူန်းတခံင်မဝ်း။ ဆငည်းဒီန် ဉီးဆန်းအောင်ယိူဝ်ႇဒါပဂါင်ကဲ စီလီပ်အီတ်ခေဲင်ႎှါင်း။ ခူန်ဒီန်စီဆမွံတ်အ်ုန်ဒါႈ မှောမည်းယိူဝ်ႇဒေဲႈ ဆမွံတ်အီနူးအီနီးတအ်ုန်။ အ်ုန်ဒါႈ မည်းဆံမ်လိုလာ်ႎီရ်ဒေဲႈ ကဇေန်နီး ဟောည်ႇဒီန် ကဲစီတုဘက်ဖါ်ႈလာ်ဒါ မဲႈအ်ုန်။ ဟောည်ႇဒီန် ကဲစီပဴင်ယံမ်းပွံတ်။ အ်ုန်မာ် ဘံန်ဟောည်ႇပဴင်ယံမ်းအ်ုန်တ ရနားအ်ုန်ဒီန် တိုအီးရဝ်ကဲဒါႈ အ်ုန်ကံပ်ဒေဲႈဟြီုက်ဘိုးဒေညွံတ်ဖိင်ခေဲင်ရဝ်။ ဘ္လံက်ချှံန်အ်ုန်ဟိုက် ညှံမ်လှေင်ခံင်။ ဆီုင်ဘိူန်းလိူည်အာရ်ဆငည်း။ ဟည်ပဲန်ဟာဝ်းပွံတ် အမှုပျံမ်းတိုအီး။ ကဇေန်နီး တိုအီးခေဲင်ရဝ်ကဲဂီုည်ဒါႈ အ်ုန်ဒါ့်ချြံင်အူန်းလိူည်အ်ုန် ခေဲင်ရဝ်ကော်င်းခါးဒီန်ယာ့်”
ဘိူန်းအယ်နံပ်တောပ်ပ်ုန်က္လာင်း ကောန်အီပ်ုန်ရကႎိုည်နီန်ဒါႈ ဆာ်မိုႈတိုပိုင်းခန္ဓာယံမ်း ဉီးဆန်းအောင်ဒီန် ကဲဟည်တိုက်ဆံင်ကျိုဖါ်ႈ ခည်ကျံရ်ဇူန် ဆငည်း 11ဒိူန် စရိက်ကနာည်လံက်လယ်အ်ုန်မာ် ညှံမ်မိူဝ်ႈစိ ဘည်ရံပ်လာည်း ကဒါႇ KIA ကဲ တဇီုင်းကပ္လိူင် ကဘ္လာင်းဆာင်လာင်ဒဲႈအောႏ။
တိုအီးခေဲင်အရာပ်ကဲက္လာင်းဒါႈ ရမာအ်ုန်ကဲ မှာန်းအူန်းခူန်ကဲအီဂေါည်ရကႎိုည်ကဲနီန် တိူဝ်ႈလာည်းအရေးဒါင်းဒါင်း တောပ်ဉပဒေဆီုက် နှာင်းကံပ်မိူဝ်ႈ လံပ်ဖြေင်ကဒိူဝ်ႈ ကဆီုဝ်အမှုဘ်ုပ်ယံမ်းဟာဝ်း ဉီးဆန်းအောင်နီန်အောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
