ရွှေဖီမြေ၊ စက်တင်ဘာ ၁၂ ရက်၊ နမ့်ဆန်
တအာင်းပြည် ပညာရေးကောင်စီ- TLEC ဖွင့်လှစ်တဲ့ ၂၀၂၅-၂၀၂၆ ပညာသင်နှစ်မှာ အထက်တန်းစာမေးပွဲ ဖြေဆိုသူ ၁,၁၀၉ ဦးရှိပြီး အောင်မြင်သူ ၅၂၆ ဦးအထိ ရှိခဲ့တယ်လို့ TLEC ရဲ့ အစီရင်ခံစာမှာ ဖော်ပြတာကို တွေ့ရပါတယ်။
နမ့်ဆန်မြို့နယ်မှာ ဖြေဆိုသူ ၄၀၄ ဦးနဲ့ နမ့်ခမ်းမြို့နယ်မှာ ၄၀၁ ဦးအထိ ရှိတာကြောင့် ဖြေဆိုသူ ကျောင်းသူကျောင်းသားဦးရေ အများဆုံးမြို့နယ် ၂ ခုအဖြစ် ရပ်တည်နေပါတယ်။
ဒါ့အပြင် မန်တုံမြို့နယ်မှာ ၁၀၅ ဦး၊ နမ္မတူမြို့နယ်မှာ ၈၃ ဦး၊ ကွတ်ခိုင်မြို့နယ်မှာ ၇၉ ဦး ရှိကြပြီး ကျောက်မဲမြို့နယ်မှာတော့ ကျောင်းသူကျောင်းသား ၃၇ ဦးသာ ရှိတာကြောင့် ဖြေဆိုသူ ရာခိုင်နှုန်း အနည်းဆုံးအဖြစ် ရပ်တည်နေသလို အောင်မြင်သူ ၁၂ ရာခိုင်နှုန်းသာရှိတာ တွေ့ရပါတယ်။
ဖြေဆိုခဲ့တဲ့ BECA စနစ်သစ် G-12 စာမေးပွဲဟာ Online ပေါ်မှာ ဖြေဆိုခဲ့ရတာကြောင့် ကျောင်းသူကျောင်းသားတွေဟာ အင်တာနက် အဆင်မပြေမှုနဲ့ ကြုံတွေ့ခဲ့ကြရသလို IT နည်းပညာ မကျွမ်းကျင်တဲ့ ကျောင်းသူကျောင်းသားတွေအတွက် Mobile phone error တက်တာမျိုးတွေ ကြုံတွေ့ခဲ့ကြရတယ်လို့ အစီရင်ခံစာမှာ ဖော်ပြထားပါတယ်။
စာမေးပွဲကို ကျောင်းသူကျောင်းသား ၄၇ ရာခိုင်နှုန်းသာ အောင်မြင်ကြပြီး တစ်ဝက်ကျော်ကတော့ စာမေးပွဲ ကျခဲ့ကြပါတယ်။
ဒါပေမဲ့ အထက်တန်းပညာရေး ဆက်လက်မသင်ယူနိုင်တဲ့ ကျောင်းသူကျောင်းသားတွေအတွက် TLEC က ၁၅ လ ကြာမြင်မယ့် GED သင်တန်း ဖွင့်လှစ်ပေးမှာ ဖြစ်သလို စာမေးပွဲ အောင်မြင်ပြီးတဲ့သူတွေလည်း ဥပဒေကျောင်း၊ နိုင်ငံရေးသိပ္ပံကျောင်း၊ သူနာပြုကျောင်း၊ ဆေးသက္ကသိုလ်၊ IT နည်းပညာကျောင်း စတဲ့အဆင့်မြင့်ပညာရေးဆီ တက်လှမ်းနိုင်မှာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
