ယာရူစိင်၊ ဇွန်လ ၈ ရက်၊ နမ္မတူ
ရှမ်းမြောက် နမ္မတူမြို့နယ် ပန်လုံကျေးရွာက အမျိုးသား ၂ ဦး နမ့်မြီးချောင်းမှာ ငါးမိုင်း ခွဲရင်း ကြိုးမိုင်း နင်းမိလို့ ၁ ဦး သေဆုံးခဲ့တယ်လို့ သေဆုံးသူ အမျိုးသားနဲ့ နီးစပ်သူတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ ဇွန်လ ၅ ရက် မနက် ၁၁ နာရီဝန်းကျင်မှာ နမ့်မြီးချောင်းဘက် ငါးမိုင်း ခွဲဖို့ သွားရာကနေ ကြိုးမိုင်း နင်းမိလို့ အသက် ၃၀ နှစ်အရွယ် မောင်အိုက်ကျန်ဆိုသူ သေဆုံးခဲ့တာလို့ ဆိုပါတယ်။
နီးစပ်သူတစ်ဦးက “သူတို့ ၂ ယောက်သွားတာ။ အဲဒီချောင်းဘေးမှာက တောသစ်သီး ခူးပေးဖို့ အိုက်ကျန်က သူ့သူငယ်ချင်းကို တက်ခူးခိုင်းတာ။ အိုက်ကျန်က သစ်ပင်အောက်နားလေးမှာ ကြိုးတစ်ကြိုး နင်းမိတော့ အဲမိုင်းက ပေါက်သွားတာ။ သူ့ရင်ဘတ်တစ်ခုလုံး ထိသွားတာနဲ့ ရေချောင်းဘေးမှာ သေပြီး ကျသွားတာ။ သူ့သူငယ်ချင်းကျ အပင်ပေါ်မှာဆိုတော့ ဘာမှမဖြစ်ဘူး။ အဲဒီနမ့်မြီးချောင်းအနီးမှာပဲ သူ့ကို သင်္ဂြိုလ်လိုက်ပြီ” လို့ ပြောပါတယ်။
သေဆုံးတဲ့ မောင်အိုက်ကျန်ဟာ တရုတ်ဘက်ကနေ ပန်လုံကျေးရွာ ရပ်ကွက်(၂)မှာ ပြောင်းရွှေ့နေထိုင်သူ ဖြစ်ပါတယ်။
ရှမ်းမြောက်မှာ ၂၀၂၆ ခုနှစ် ဇန်နဝါရီလကနေ ဇွန်လ ၈ ရက်အထိ ၅ လကျော်အတွင်း ရွှေဖီမြေက ပြုစုထားတဲ့ စာရင်းအရ မြေမြှုပ်မိုင်းနဲ့ စစ်ကျန်လက်နက်တွေကြောင့် ကလေးတစ်ဦးအပါအဝင် ၄ ဦး သေဆုံးခဲ့ပြီး ၁၇ ဦး ထိခိုက်ဒဏ်ရာ ရရှိခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
