ဆုမွန်၊ ဇွန်လ ၉ ရက်၊ မူဆယ်
စစ်ကောင်စီတပ် ထိန်းချုပ်ထားတဲ့ တရုတ်-မြန်မာနယ်စပ် မူဆယ်မြို့မှာ ရွှေအရောင်းအဝယ် လုပ်နေတဲ့ လင်မယားနှစ်ဦးကို အမည်မသိ အမျိုးသား ၄ ဦးက သေနတ်ထောက်ပြီး ဓားပြတိုက်သွားတယ်လို့ ဒေသခံ အမျိုးသားတစ်ဦးက ရွှေဖီမြေသို့ ပြောပါတယ်။
မနေ့ ဇွန်လ ၈ ရက် နေ့လယ်ပိုင်းမှာ မူဆယ်မြို့ တောင်ရပ်ကွက်မှာ နေထိုင်တဲ့ အဆိုပါ လင်မယားနှစ်ဦးဟာ ဈေးကနေ ပြန်လာချိန်မှာ ဓားပြတိုက်ခံခဲ့ရတာ ဖြစ်ပါတယ်။
ဒေသခံအမျိုးသားက “ဈေးမှာ သူတို့ ရွှေဆိုင်ဖွင့်ထားတယ်။ ဈေးကနေ ပြန်လာတဲ့အချိန် လမ်းတစ်ဝက်မှာ ဓားပြတိုက်ခံရတယ်။ သူတို့နှစ်ယောက်ပါလာတဲ့ပစ္စည်းတွေ အကုန်ပါသွားတယ်။ တော်သေးတာပေါ့။ သူတို့နှစ်ယောက်က ဘာမှမဖြစ်သွားဘူး။ အဲဒီဓားပြတွေက စက်မှုဘက် ထွက်သွားပြီး အဲဘက်မှာပဲ သူတို့ ကားရပ်ထားတယ်။ သူတို့ ကားစက်တောင် မပိတ်သွားဘူး။ ကားစက်နှိုးထားပြီး ဆိုင်ကယ်နဲ့ ထွက်ပြေးသွားကြတယ်” လို့ ဆိုပါတယ်။
ဓားပြတိုက်သွားတဲ့ အဆိုပါ အမျိုးသား၄ ဦးကတော့ လက်ရှိအချိန်ထိ ထွက်ပြေးလွတ်မြောက်နေဆဲဖြစ်ပြီး ဓားပြတိုက် လုယက်ခံရမှုမှာ ဘာတွေပါသွားလဲဆိုတာလည်း တိတိကျကျမသိရေသးပါဘူး။
နယ်စပ်မြို့ဖြစ်တဲ့ မူဆယ်မှာ အခုလို လုယက်မှု၊ ဓားပြတိုက်မှုတွေအပြင် ခိုးမှုတွေလည်း မကြာခဏဖြစ်ပေါ်နေပြီး ပြီးခဲ့တဲ့ ဖေဖော်ဝါရီလ ၂၃ ရက်ကလည်း မူဆယ်မြို့ရှိ “888 BBQ” စားသောက်ဆိုင်မှာရှိတဲ့ ဆိုင်ကယ်တစ်စီးကို အမည်မသိ အမျိုးသား ၃ ဦးက ခိုးယူသွားခဲ့တဲ့ ဖြစ်စဉ်လည်း ဖြစ်ပွားခဲ့ပါတယ်။
စစ်ကောင်စီတပ် ထိန်းချုပ်ထားတဲ့ မူဆယ်မြို့အပြင် လားရှိုးမြို့မှာလည်း အခုလို ဓားပြတိုက်မှု၊ လူသတ်မှုနဲ့ ခိုးမှုတွေ မကြာခဏ ဖြစ်ပွားနေပြီး သက်ဆိုင်ရာတွေက လက်ရှိအချိန်အထိ ထိရောက်တဲ့ အရေးမှုတွေ လုပ်ဆောင်နိုင်တာ မရှိဘူးလို့ မြို့ခံတွေက ဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
