မိုင်းရူပ၊ မေလ ၃၁ ရက်၊ လားရှိုး
စစ်ကောင်စီတပ် ထိန်းချုပ်ထားတဲ့ ရှမ်းမြောက် လားရှိုးမြို့ ရပ်ကွက် (၅) မှာ စာသင်ကျောင်းပိုင်မြေဆိုပြီး တိုက်ခန်းတွေအပါအဝင် နေအိမ် ၁၅ လုံးထက်မနည်းကို စစ်ကောင်စီတပ်ဘက်က ဘူဒိုဇာနဲ့ ဖြိုချဖျက်ဆီးနေတယ်လို့ လားရှိုးမြို့ခံတွေဆီကနေ စုံစမ်းသိရပါတယ်။
ဖျက်ဆီးခံရတဲ့ နေအိမ်တွေဟာ လားရှိုးမြို့ ရပ်ကွက် (၅)၊ နယ်မြေ (၁၉) မှာရှိတဲ့ အခြေခံပညာမူလတန်းကျောင်းပိုင် နယ်မြေဖြစ်တယ်ဆိုပြီး စစ်ကောင်စီတပ်ဘက်က ဒီနေ့ မေလ ၃၁ ရက်မှာ ဘူဒိုဇာနဲ့ ဖြိုချဖျက်ဆီးနေတာလို့ ဆိုပါတယ်။
ဖျက်ဆီးခံရတဲ့ နေအိမ်တွေအထဲမှာ သိန်းထောင်ချီတန်တဲ့ နေအိမ်တွေလည်း ပါဝင်တယ်လို့ လားရှိုးမြို့ခံ အမျိုးသားတစ်ဦးက ရွှေဖီမြေကို ပြောပါတယ်။
“အဲဒီဘက်ခြမ်းဆို အနည်းဆုံး ၁၅ အိမ်လောက်ရှိတယ်။ အမက (၅) ကျောင်းပိုင်အိမ်ဆိုပြီး ဖျက်တာ။ ဖျက်ခံရတဲ့အထဲမှာ RC တိုက်တွေရော ပါတယ်။ မြင်ရတာ စိတ်မကောင်းဘူး” လို့ ဆိုပါတယ်။
ကျောင်းပိုင်မြေဆိုပြီး စစ်ကောင်စီ ဖြိုချဖျက်ဆီးနေတဲ့ နေအိမ်တွေဟာ လူထုတွေ နေထိုင်တာ လွန်ခဲ့တဲ့ ၁၅ နှစ်ဝန်းကျင်က စစ်တပ်နဲ့ အမက (၅) က လူထုတွေကို ရောင်းချခဲ့တဲ့ မြေနေရာဖြစ်တယ်လို့ ၎င်းက ဆက်ပြောပါတယ်။
ပြီးခဲ့တဲ့ မေလ ၂၆ ရက်မှာ ရပ်ကွက် (၉)၊ နယ်မြေ (၁) မှာလည်း နေအိမ် ၉ အိမ်ကို စစ်ကောင်စီက တပ်ပိုင်မြေဆိုပြီး ဘူဒိုဇာတွေနဲ့ ဖြိုချဖျက်ဆီးခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
