ဆုမွန်၊ ကျံရ်မေ ဆငည်း 24၊ လာဆေဝ်
တိုအီးခေဲင်အရာပ်ကဲ က္လာင်းတဆျှိုည်ဖီမျေဒါႈ ဘည်ဆီုပ်မိူဝ်ႈ အီးဒါႈဖါ်ႈနံင်ဇိူရ်ႈကား စီကောႈဒဝ်လည်လေႈဟာဝ်း ခေဲင်ကီုင်းလာဆေဝ် ကပီုန်ဆျှံမ်ကဒါႇပိူည် အ်ုန်အီမိုႈဒီပ်ုန်ထိင်ခြဲအူန်း တံပ်ကညာအာဏာဆီုက်ဇေဝ်ကဲနီန် ဘည်ကတူႈအီးတဘြားကားကဲနီန်မာ် ဆီုင်ဒါ့်ဆီုပ်မိူဝ်ႈအူန်းအောႏ။
ခည်ကျံရ်မေ ဆငည်း 21 စူန်မှိူဝ်ကပံတ် 6နြီဒိူန် ကောန်အီမာည်း ကဝ်အီအီတ်ပဂါင်အီတ်ရလှဝ် စိန်လဲ့ညို ရအာည်ႇမာန်ဆူ ဇံင် (ကီုင်းလာဆေဝ်နီန်အူအီး ဒါႈဖါ်ႈနံင်ဇိူရ်ႈကား စီကောႈဒဝ်လည်လေႈဟာဝ်းလာ်အောႏ။
ကဝ်အီဂေါည်ကဒံတ်တောပ် ကဝ်အီကတူႈဒီန် က္လာင်းဒါႈ “အ်ုန်ဒါႈတယဲဒါႈ အ်ုန်နံင်ဇိူရ်ႈကား။ ဘံန်မိုႈအ်ုန်ဒါႈနံင်စါမ်းကောႈတိူရ်ႈ ယဲမာ် ဟံပ်ဟာဝ်းတိုအီးယဲတောပ်အ်ုန်အူအီး။ ဘံန်ဟည်ရောတ်ကဒည်ဒေင် ကားဒီန်ဟည်ကတူႈ ထောက်ဘတ္ထရီဒီးကော်။ မိုႈလိူည်ခိင်ဒါႈနံင်လေႈထောက် ဘတ္ထရီဒီန် အ်ုန်ဟည်ကောႈဒဝ်ဟာဝ်း။ အ်ုန်စါမ်းကောႈတိူရ်ႈ ကဒါႇဒေင်အိုမ်ငျံရ်။ အ်ုန်ကောႈဒဝ်ဟာဝ်းလိူည် ကဒါႇဒီန်”
ဘာည်းလိူည်ဒီန် ခည်ကျံရ်အေပ်ြုရ် ဆငည်း 21ဒိူန်မာ် ပဲန်ဒေဲႈစံမ်အမှု ကောန်အီမာည်းအာရ်အီး ဒါႈဖါ်ႈနံင်ဇိူရ်ႈကား စီစါမ်းကောႈဟာဝ်းဖါ်ႈ ကဒါႇဇံင် (5) ကီုင်းလာဆေဝ် ဆဲႈဒါႇဒီန် ဂါရ်ပျံမ်းယံမ်းဖါ်ႈ ကညာကားကိုဆန်းအောင် ဘိူန်းအဆာက် 38ဆန်ုမ်နီန် စီတိူဝ်ႈဟာဝ်းလာ်ကားဒီန်အောႏ။
ခည်ဆန်ုမ် 2025 ကျံရ်အံက်တိုဘာ ဆငည်း 18ဒိူန်မာ် တိူမ်မိူဝ်ႈဒေဲႈအေ့ ကောန်အီမာည်းအူအီးကာည်း ကောန်အီပ်ုန်အူအီး ဒါႈဖါ်ႈနံင်ဇိူရ်ႈကား စီစါမ်းကောႈတိူရ်ႈ ပတကာႈဒေင်တိုင်းရုံး အ်ုန်အီဂေါည်ပဇံင် (10) ကီုင်းလာဆေဝ်နီန် စီကောႈဘြားဟာဝ်းလာ် ကား Crown အူကြောင်အောႏ။
ပကီုင်းလာဆေဝ် ဆဲႈဒါႇအမှုစိုန် အမှုပျံမ်းတိုအီး၊ အမှုဘြားမာ် ဂေါည်ဂေါည်ပဲန်ဒေဲႈဖါ်ႈ ကဒါႇတံပ်ကညာအာဏာဆီုက်ဇေဝ်ကဲမာ် မောကံပ်ရောတ်ကဇေန်နီး ကဲညှံမ်ဘယ်စိဒေ ရံပ်တိုည်း တိူဝ်ႈလာည်းအရေးတကဲအောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
