ရွှေဖီမြေ၊ မေလ ၂၂ ရက်၊ နမ့်ဆန်
တအာင်းဒေသက လက်ဖက်တန်ဖိုး မြှင့်တင်နိုင်ဖို့ဆိုပြီး နိုင်ငံတကာ လက်ဖက်နေ့ကို တအာင်းဒေသ နမ့်ဆန်မြို့မှာ ပထမဆုံးအကြိမ် ကျင်းပခဲ့ကြပါတယ်။
နိုင်ငံတကာ လက်ဖက်နေ့ကို ကျင်းပတာဟာ တအာင်းဒေသရဲ့ အဓိက ဒေသထွက်ဖြစ်တဲ့ လက်ဖက်ရဲ့တန်ဖိုးနဲ့ ဈေးကွက်အလားအလာကို ပိုမိုဖော်ထုတ်မြှင့်တင်နိုင်ဖို့ ရည်ရွယ်ကြောင်း တအာင်းတပ်မတော်က မနေ့ မေလ ၂၁ ရက်မှာ ထုတ်ပြန်ပါတယ်။
နမ့်ဆန်မြို့မှာ ကျင်းပတဲ့ နိုင်ငံတကာ လက်ဖက်နေ့မှာ လက်ဖက်စို၊ ဒယ်အိုးလှော်လှန်းနဲ့ Green Tea စတဲ့လက်ဖက်ပြိုင်ပွဲကိုလည်း ထည့်သွင်းကျင်းပခဲ့တယ်လို့ ဆိုပါတယ်။
နိုင်ငံတကာ လက်ဖက်နေ့ကို မေလ ၂၁ ရက်မှာ ကျင်းပလေ့ရှိပြီး လက်ဖက်စိုက်ပျိုး ထုတ်လုပ်သူတွေရဲ့ အခန်းကဏ္ဍ၊ လက်ဖက်လုပ်ငန်းရဲ့ စီးပွားရေး အရေးပါမှုနဲ့ လက်ဖက်ယဉ်ကျေးမှုကို ပိုမိုအသိအမှတ်ပြုနိုင်ဖို့ ရည်ရွယ်တယ်လို့ ဖော်ပြထားပါတယ်။
နိုင်ငံတကာ လက်ဖက်နေ့ အခမ်းအနားကို တအာင်းပြည်ကောင်စီ- TLC ရဲ့ ဒုဥက္ကဋ္ဌ(၁) ဒီဒီမိုးခမ်း၊ ပလောင်လက်ဖက် စိုက်ပျိုးထုတ်လုပ်ရောင်းချသူများအသင်း နာယက ဦးအောင်ကြီး၊ ဥက္ကဋ္ဌ ဦးအောင်နိုင်ဝင်းအပါအဝင် လက်ဖက်လုပ်ငန်းရှင်နဲ့ စီးပွားရေးလုပ်ငန်းရှင် စုစုပေါင်း ၂၀၀ ကျော် တက်ရောက်ခဲ့ပါတယ်။
တအာင်းဒေသ နမ့်ဆန်နဲ့ မန်တုံမြို့နယ်ရှိ တအာင်းလူထုတွေဟာ လက်ဖက်လုပ်ငန်းကို အဓိက အသက်မွေးဝမ်းကျောင်းလုပ်ငန်းအဖြစ် လုပ်ကိုင်ကြတာပဲ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
