မိုးထဲတ်၊ ကျံရ်မာချှ် ဆငည်း 20၊ 105မဲင်
တိုအီးခေဲင်အရာပ်ကဲ က္လာင်းဒါႈ တံပ်ကိုးကာင်း – MNDAA ကဲ ကပျောတိုအီးရဝ်တအာင်းကဲ အီဂေါည်ပ 105မဲင် လှံင်မူစယ်ကဲနီန်ဒါႈ ကဲအီဘိူန်းအဆာက် 18ဆန်ုမ်ကဲဒိူန် နံင်လိုဒေဲႈထာမ်းဒိုႇ ဇီုင်းကာန်ဆီုက်တကဲအောႏ။
ဆဲႈဒါႇ 105မဲင် လှံင်မူစယ်နီန် တံပ်ကိုးကာင်းကဲ တောႇဖါ်ႈပါင်ကမိုန်တ ရဝ်နံမ့်ဟော်ည်ဒိူဝ်ႇ၊ နံမ့်ဟော်ည်ဂိုရ်၊ မာန်မော်၊ နံမ့်တဝ်း၊ ဝေလုကာည်း နံမ့်အူန်းကဲနီန် က္လာင်းကနာည်နံင်ဒေဲႈထာမ်းကဲတဇီုင်းကာန်ဆီုက် ခည်ကျံရ်မာချှ် ဆငည်း 19 ကပံတ်ခိင်ညှာဒိူန်အောႏ။
ကောန်အီပ်ုန် ကဝ်အီဂေါည်ခေဲင်အရာပ်ဒီန်အူအီး က္လာင်းဒါႈ “ကဇေန်နီး ခံင်မိုႈကဲနံင်ထိင်ခြဲ 105မဲင်ႏနီန် ကဲဒါႈနံင်လိုထာမ်းလိူည်ဇီုင်းကာန်ဆီုက်ကဒါႇကဲ။ ကဲကဲပ်ဟာဝ်းစြာင်း ကဲအီဟောည်ႇဘိူန်းအဆာက် 18ဆန်ုမ်ကဲဒိူန်။ မိုႈလိူည် အဆေမာ်ညှံမ်ဒဲႈစိစြာင်း။ ယဲဒါႈအူန်း ယဲနံင်လိုဆမွံတ်ဆဲ့ ကဒါႇ TNLA ကဲရအာည်ႇ။ ဆာ်လိုဟာဝ်းဘိုးကဒါႇကဲ ကဒါႇ TNLA ကဲ နံင်ရံပ်ခါမ်လာ့်။ ဟောည်ႇဒီန် ကဒါႇတွည်းမာ်လိုဟာဝ်း ကဒါႇနီန်မာ် ဆာ်လိုဘိုးဟာဝ်း အ်ုန်အာဝ်ဘာည်းစိဒါႈ။ ယဲက္လာင်းအူန်း ဆာ်ကဒါႇ TNLA ကဲခွါင်း ယဲစီနံင်ဒဲႈလာ် ကောန်ယဲကဲဟာဝ်း”
မိူဝ်ႈဘိုးကောန်အီမာည်း အူအီးက္လာင်းဒါႈ ဆဲႈဒါႇဒီန် မိူဝ်ႈဘိုးဘည်က္လာင်းအူန်းကဲ တကောန်ဆီုက် TNLA ကဲအီဂေါည်ခေဲင်ရဝ်တအာင်း အီဂေါည်ပ 105မဲင်ႏကဲနီန် ဒေဲႈထာမ်းဇီုင်းကာန်ဆီုက်တကဲအောႏ။
“ကဝ်အီကတူႈကိုးကာင်းကဲ တိုည်းအ်ုန်ပအေဲမ်ကိုက်ဒိူန် ဟည်ဘိူန်းလေႈအမှိူဝ်ယာ့်။ ကဲဒါႈတအ်ုန် ဆာ်မည်းမိူဝ်ႈလာက်နာက်ကာည်း တဆီးဆီုက်တအာင်း ဒေဲႈအာပ်ဖါ်ႈတယဲ စီဒေဲႈပဲန်ဆီုက်ကဒါႇယဲ။ ရူရ်ႈကျံရ်မာ် ယဲနံင်ဒဲႈ။ ကဲဒဲႈဖါ်ႈ ငေါႈကားအ်ုန် ယိူဝ်ႇပအေဲမ်ကိုက်ဒီန် ရောတ်ပ 105မဲင်ႏ စီပ္လေႈႎီရ်အ်ုန်။ ဆာ်မိုႈဆနာတ်အ်ုန် ကဲအာဝ်ႎီရ်ဒဲႈစိ။ ကိုးကာင်းကဲ ဂီုည်ဆီမ်းအူန်း။ ရူပ်ရာင်အ်ုန်ကာည်း ဇီုဝ်အ်ုန်မာ် ကဲလာည်းအူန်းအေ့။ ကဲဒါႈ ကနာည်နံင် လီပ်ခေဲင်တံပ်ကဲဒီးကော်”
တိုအီးခေဲင်အရာပ်ကဲ က္လာင်းဒါႈ မိူဝ်ႈအေ့ဘည်တောႇက္လာင်း MNDAA ကဲတ တာဘြောင်ရဝ် ရဝ်တအာင်း ကဲအီဂေါည်တောပ်ဒေင်ဒါင်း ရဝ်နံမ့်ဖကာ လှံင်အေဲမ်ကိုက်ကာည်း 105မဲင်ႏ လှံင်မူစယ်ကဲနီန် ကနာည်နံင်ဒေဲႈအာပ်ဒိုႇ လာက်နာက်ကာည်း တဆီးဆီုက် TNLA ကဲအောႏ။
ဆဲႈဒါႇဒီန် တိုအီးခေဲင်အရာပ်ကဲ က္လာင်းဒါႈ ခည်ကျံရ်မာချှ် ဆငည်း 17ဒိူန် ခိင်ညှာဒိူန်မာ် တံပ် MNDAA ကဲ တောႇဖါ်ႈပါင်ကမိုန်တ တာဘြောင်ရဝ် အီဂေါည်ပ 105မဲင်ႏ၊ နံမ့်ဟော်ည်ဒိူဝ်ႇ၊ နံမ့်ဟော်ည်ဂိုရ်ကာည်း နံမ့်တဝ်းကဲနီန် ဆမွံတ်မိူဝ်ႈအာဝ်မိူဝ်ႈ အီထာမ်းဇီုင်းကာန်ဆီုက်တ TNLA ကဲကာည်း ဆာ်မိူဝ်ႈမာ် ကဲဆူည်ႇအီးဒေဲႈအာပ် စြာင်းကဲအီဟာဝ်းကဲဒီန်အောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
